– Бында ниндәй сара булыуы көтөлә? – тип юрамал аптыраулы ҡарашымды эргәмдә торған оҙон буйлы ағайға тө­бәйем.
– Ҡыҙыбыҙ диплом ала бөгөн, шул ҡыуаныс­тан баш ҡалалабыҙ, – тине ул.
Әлеге танышым, Марат Сырлыбаев, алыҫ тип тормай, Баймаҡ районының Мерәҫ ауылынан Өфөгә 500 саҡрым ер үтеп килгән. Ҡыҙы Динара биш йыл ошо институтта белем алған икән. Ағай эргәһендә баҫып торған мөләйем йөҙлө ҡа­тыны, Нур исемле улы, йәнә биш йәш­лек ейәнсәре менән таныш­тырҙы.
– Бәләкәйҙән хәрби кеше булырға хыял­ланды, тәртип һәм таҙалыҡ яратты, – тип һүҙгә ҡушыла Динараның әсәһе Гөлнара Сырлыбае­ва. – Тәфтишсегә уҡыны, бик ауыр һөнәр, әлбиттә. Яуап­лылыҡ унда бик көслө, йөҙөбөҙгә ҡыҙыл­лыҡ килтермәҫ, тулы­һын­са ышанабыҙ. Баймаҡ ҡалаһына эшкә ҡайтасаҡ.
Институт биләмәһенә аяҡ баҫҡас та үҙемде бөтөнләй бүтән донъялағылай хис иттем, хатта ошонда йөрөү күңелле әрме хеҙмәтен әҙме-күпме иҫкә тө­шөрҙө. Таҙалыҡтан асфальт көҙгөләй ялтырай, газондағы үлән тигеҙ генә итеп сабылған, төр­лө ағастар тирә-яҡты йәмләй. Ҡупшы йорттар­ҙың эсенә инеп ҡарарға теләк тыуҙы, ләкин ваҡыт тығыҙ. Плацҡа теҙелгән егет һәм ҡыҙ­ҙар­ҙың йөҙө май ҡояшылай балҡый. Офицер­ҙарҙың, шулай уҡ курсанттарҙың ыҫпай кейеме һәр кемде көнләште­рер­лек! Оркестр дәртле көй уйнай.
Тантана башланыр алдынан уҡыу йортоноң флагын сығарҙылар, Рәсәй һәм Башҡортостан гимндары яңғыраны.
Рәсәй Эске эштәр министрлығының Өфө юридик институты начальнигы Фәим Мөхәмәт­шин белдереүенсә, илебеҙҙең именлеге, яҡты киләсәге офицерҙар менән туранан-тура бәй­лән­гән. Генерал-майор һәр кемгә уңыштар, үҫеш теләне. Дәүләт Йыйылышы – Ҡоролтай Рәйесе Константин Толкачев, Башҡортостан буйынса эске эштәр министры Михаил Закомалдин һәм башҡа мәртәбәле ҡунаҡтар ҙа буласаҡ офицерҙарҙың шатлығын уртаҡ­лаш­ты.
Был көндө өс йөҙгә яҡын курсант диплом һәм лейтенант погоны алып һөйөн­дө. Альбина Рәимова менән Жанна Иҫән­ғазинаға иһә алтын миҙал тапшырылды, шулай уҡ ун ҡыҙ һәм егеттең уҡыу йортон ҡыҙыл диплом­ға тамамлауы асыҡ­ланды.
Сара тамамланыр ваҡыт еткәндә сәскә гөлләмә­лә­ренә күмелгән сибәр лейтенант ҡыҙ янына яҡынайҙым. Уның да исеме Динара икән, ул да – тәфтишсе. Ҡыҙҙы ҡотларға Силә­бенән ире Динар, Мәсетле районының Оло Ыҡтамаҡ ауылынан әсәһе Гүзәл Ғәбиҙуллина, Өфөнән ҡайныһы Руслан Рамаҙанов килгән.
– Әсәйем – табибә, тимәк, кеше һау­лығы өсөн яуаплы, – ти Динара. – Ә ми­нең бурысым – әҙәм балаһының күңелен дауалау. Быға алдан һәм ныҡлы әҙерлән­дем. Ғөмүмән, ғәҙеллек яҡлымын. Хеҙмәт юлым тыуған яҡтарымда башланасаҡ, шул бәхет түгелме ни?!
Рәсәй Эске эштәр министрлығының Өфө юридик институтында байрам оҙаҡ дауам итте. Мөҡсинов урамынан һулға ҡайырылып, Софья Перовская урамы буйлап атлағанда ла оркестр тауышы тынмағайны әле...