Хәйер, ниндәй телдә аралашырға икән, тип оҙаҡ баш ватырға тура килмәне – Элизабет урыҫ телен бик яҡшы өйрәнгән, иркен һөйләшә. Хатта башҡортса ла әйтеп ебәрә. Был яҡтарға ул тәүгә юлланмай: дүртенсе йыл рәттән Юлдыбайға килеп, урындағы халыҡ менән танышып, ара­лашып, үҙенә кәрәкле мәғлүмәт туплай. Ҡулынан бер ваҡытта ла фото­аппарат төшмәй, һәр мәлде мәңгеләш­терергә теләгәндәй, үҙен ҡыҙыҡ­һын­дырған бар күренеште фотоға төшөрә. Башҡорт халҡының тарихы, тормош-көнкүреше, милли ғөрөф-ғәҙәте менән яҡындан танышыу маҡсатында был төбәккә килгән Элизабет көндәлек ауыл тормошонда ҡайнап йәшәй: һыйыр ҙа һауа, йорт эштәрендә лә булыша. Ул Юлдыбай ауылында йәшәгән танышының әсәһендә тора. Үҙе хаҡында һөйләүен үтенгәс, бик ҡыуанып, ихлас йылмайып риза булды яңы танышым.
– Вена ҡалаһында тыуып үҫтем. Әле университеттың география һәм төбәк кафедраһында эшләйем. Беҙҙең уҡыу йорто Өфө дәүләт нефть техник университеты менән хеҙмәттәшлек итә. Тәүге тапҡыр Башҡортостанға коллегаларым менән килдем, төрлө тикшеренеүҙәр үткәрҙек. Артабан ниндәйҙер ауылдың тарихын, йә­шәйешен өйрәнеү теләге тыуҙы. Танышым әсәһенең адресын биргәс, Юл­дыбайға юлландым. Социаль антрополог һөнәрен үҙләштерҙем, әле докторлыҡ диссер­тацияһы өсөн төрлө мәғлүмәт йыям, – тип һөйләне ул. – Миңә бигерәк тә кис Һаҡмар йылғаһы буйында йөрөү оҡшай. Ҡоштарҙың һайрауы үҙе бер ғәжәйеп оркестрмы ни! Башҡор­т­остандың хозур тәбиғәтенә, уның эшсән, тырыш халҡына һоҡланыуымдың сиге юҡ. Ирәмәл, Яманташ тауҙарына, изге урынға – Мөжәүир хәҙрәт ҡәберенә – сәфәр ҡылырға насип булды. Бигерәк тә баш­ҡорттарҙың һабантуйы мине әсир итте. Тәүҙә Учалы районы һабантуйында ҡат­нашҡайным, быйыл иһә Йылайырҙағы халыҡ байрамын тамаша ҡылдым.
Ата-әсәһе менән донъяның күп кенә илдәрендә – Швеция, Финляндия, Нор­вегия, Германия, Бельгия, Украина, Ис­лан­дияла – булған Элизабет Офнер Башҡортостанды барыһынан да мату­рыраҡ, мөғжизәле төбәк тип иҫәпләй. Сит ил ҡунағына шулай уҡ шифалы эсемлегебеҙ ҡымыҙ, ҡаҙы, йылҡы ите, бал, сәк-сәк кеүек милли ризыҡтарыбыҙ ныҡ оҡшай. Моғайын, уның ғилми эшендә Йылайырҙың йырлы-моңло халҡы, башҡорт­тарҙың тарихы, көнкүреше хаҡында матур яҙмалар урын алыр.