Фәрит ӘХМӘТШИН.
Белорет ҡалаһы.

Башҡортостан мосолмандарының Диниә назараты рәйесе мөфтөй Нурмөхәмәт хәҙрәт НИҒМӘТУЛЛИН:

– Бис­мил­лә­һир-рахмәнир-рахим!
Хөрмәтле ҡәр­ҙәштәр, әс-сәлә­мү ғәләйкүм үә бә­рәкәтүһ! “Ҡөрь­ән Кә­рим”дә ҡор­бан сал­ған әҙәм ба­лаһына Аллаһ­тың изгелеге на­сип булыуы ха­ҡында әйтелә. Нимә һуң ул ҡорбан? Ул – Хаҡ Тәғәләнең рәхмә­тен өмөт итеп ҡылынған изге ғибәҙәт һәм Уға яҡын булыу. Бындай тәүге ғәмәлде Әҙәм ғәләйһис-сәләм заманында Ҡабил менән Һабил үтәгән.
“Ҡөрьән”дәге “Кәүҫәр” сүрәһендә: “Аллаһ Тәғәләнең рәхмәтен өмөт итеп намаҙ ҡыл да ҡорбан сал”, – тип әйтелгән. Мәғлүм булыуынса, төп изге ғибәҙәт мөбәрәк Зөлхизә айының 10, 11, 12-се көндәрендә ҡылына. Был мәлдә пәйғәмбәребеҙ Мөхәм­мәт ғәләйһис-сәләм ике ҡуй салған. “Тәүгеһе – үҙемдән һәм ғаиләмдән, икенсе­һе өммәтемдән”, – тигән.
Ҡорбан малы уртаса һимеҙлектә, етешһеҙлектәрҙән азат, ағзалары теүәл булырға тейеш. Сауап өмөт итеп ҡылынған ғәмәл алдынан доға ҡылына, ҡуйҙы аҙапламаҫ өсөн үткер бысаҡ алына. Салынған мал матур итеп тунала. Тиреһен кемгәлер хәйер итеп биреү зарур. Ә инде ит, өс өлөшкә бүленеп, тәүгеһе үҙең һәм ғаиләң өсөн, икенсеһе туғандар, ҡәрҙәштәр менән ризыҡланыуға ҡалды­рыла, өсөнсөһө ҡорбан сала алмағандарға, өлкән йәш­тәгеләргә, мохтаждарға таратып бирелә. Шул саҡта ҡылынған ғәмәл хәйерле булыр, иншаллаһ.
Өй алдында эт бар икән, ҡорбан малы­ның һөйәген уға бирергә мөмкин. Һиҙеү һәләте үтә көслө хайуан барыһын да белеп, үҙенә өлөш сығырын көтөп тора бит. Уға бирергә ярамай тип һөйәкте ҡайҙалыр илтеү килешмәҫ. Йортобоҙ һаҡсыһына бирәйек тә ҡалғанын матур итеп күмеп ҡуяйыҡ.
Борон ишек алдында мал сала торған айырым урын булған. Ҡалған һөйәктәр ҙә шунда күмелгән. Бөгөн дә, әл-хәмдү ли­л-ләһ, ҡорбан салғандар артҡандан-арта. Күптәр был ғибәҙәтте мәсеттә баш­ҡара. Тимәк, иман йорттары биләмәһендә ҡорбан сала торған урын булдырыу – көн талабы. Имамдарыбыҙ был йәһәттән иғтибарлы булырға тейеш.
Барыһына ла шөкөр итеп, шулай уҡ яңы нигеҙ һалғанда, сабый донъяға килгәндә, әйтелгән нәҙер буйынса ҡорбан салыу бар. Һуңғыһында салдырған кешенең итте ашамауы хәйерле, әгәр ҙә ҡапты икән, күләменә ҡарап хәйер бирергә тейеш.
Әйтеп үткәнемсә, ҡорбан салыусылар йылдан-йыл арта. Шулай уҡ ошондай ғә­мәл­гә тәғәйенләп ҡуй үрсетеүселәр ҙә кү­бәйә. Бынан 15 – 20 йыл элек ундай һарыҡты табыуы еңел түгел ине. Хәҙер иһә ҡуйҙар махсус әҙерләнә икән, бының менән шөғөлләнгәндәрҙең эшендә, тормошонда бәрәкәт насип булһын, тип теләйек.
Хөрмәтле ҡәрҙәштәр, Аллаһ Тәғәлә хәленән килгән һәр кемгә ҡорбан салырға насип итһен. Илебеҙ, ғаиләбеҙ имен, күңелебеҙ тыныс булһын, иншаллаһ. Әссә­ләмүғәләйкүм үә рәхмәтуллаһи үә бә­рәкәтүһ! Амин.