Стәрлетамаҡта баҫмаларға яҙылыу көнө ойошторолдо



– Айырым көндә ойоштороу йолаға әүерелде. Йыл да халыҡ әүҙем ҡатнаша, күптәр яҙыла, — ти Стәрлетамаҡ почтамтының матбуғатҡа яҙыу бүлеге начальнигы Наталья Морозова.
Сараның төшкә табан башланыуына ҡарамаҫтан, иртән иртүк бала-саға ла, йәштәр ҙә, инәй-бабайҙар ҙа урында ине инде. Теләгәндәр яратҡан баҫмаларына яҙылып, сараның тағы бер өлөшөн – концерт башланыуын һәм квитанциялар буйынса бүләк отоу мәлен — көттө. Шул саҡ “Башҡортостан” гәзитенең күптәнге дуҫы Мәрйәм Кәримованы тап иттем. Ул баҫмабыҙға алдағы ярты йыллыҡҡа яҙылырға тип килгән.
— Стәрлетамаҡта үткән быуаттың 60-сы йылдарынан алып йәшәйем. Һеҙҙең гәзитте лә шул осорҙан башлап алдырам. “Башҡортостан” һәр саҡ кәңәшсе лә, күңел йыуатыусы ла булды, мәғлүмәт яланы ла, — ти Мәрйәм Рәшит ҡыҙы. Әйткәндәй, Дәүләкән районынан ул, ғүмер буйы хеҙмәт кешеһе булған, “Авангард” заводында эшләгән.
Яҙылыу сараһы хаҡында шуны әйтке килә: гәзит-журналдар һуңлап таратылыу арҡаһында “Рәсәй почтаһы”н күпме генә “иләктән" үткәрмәһендәр, ошондай сара ойоштороп, гәзит уҡыусыларҙы күбәйтеү — һәйбәт күренеш. Хәйер, төп таяныс та улар бит. Ана, өҫтәүенә, баҫмаларға яҙылыусылар бүләктәр ҙә отто. Ғөмүмән, сараға килгәндәр ике ҡуянды бер юлы атты.