– Бөгөн бөтәһе 100-ҙән ашыу кеше үҙен борсоған һорауҙар менән мөрәжәғәт итте. Яҡын сит илдәрҙән, Европанан, хатта Американан үҙҙәренә йәки балаларына гражданлыҡ юллау кеүек һорау менән килгәндәр менән эш йыл дауамында бара. Бынан тыш, Рәсәй Президентының Башҡортостандағы ҡабул итеү бүлмәһенә генә гражданлыҡ инициативаһы менән опекун советтары, интернат учреждениелары вәкилдәре, ижтимағи ойошмалар етәкселәре килә. Был юлы поликлиникала педиатр булып эшләүсе ҡыҙ Бала хоҡуҡтары буйынса вәкилдең ижтимағи ярҙамсыһы булырға теләүе хаҡында белдерҙе. Ул балалыҡ, сәләмәтлек мәсьәләләре менән шөғөлләнергә, ғаиләләргә кәңәштәр бирергә әҙер булыуы хаҡында әйтте.
Айырылышҡандан һуң торлаҡһыҙ ҡалыу кеүек ауыр хәлгә тарығандар ҙа ярҙам һорап мөрәжәғәт итте. Һөйләшеүгә килгән бәлиғ булмаған малайҙы былтыр колледжға уҡырға инергә булышлыҡ иткәйнем. Бөгөн уға ниндәй аныҡ ярҙам кәрәклеге хаҡында һөйләштек. Уның хыялы – тиҙерәк белем алыу һәм эш башлау. Бынан тыш, ул етем бала булараҡ фатир юлларға һәм инвалидтар йортонан әсәһен алырға теләй.
Насар күргән һәм ишеткән кескәйҙәрҙең ата-әсәләре физик культураны һәм спортты үҫтереү маҡсаты менән килгәйне. Киләсәктә был уй-теләкте тормошҡа ашырыу буйынса саралар күрәсәкбеҙ.
Бөгөн күп кенә ғаризаларҙы ҡабул иттем. Ғәҙәттә, граждандар кәңәш һорап килә ине. Ә бөгөн, нигеҙҙә, хәл итеүҙе талап иткән мәсьәләләр менән мөрәжәғәт иттеләр.
Сираттағы мәсьәлә менән быға тиклем шөғөлләнгәнем юҡ ине: бер ир ун йыл буйы уртаҡ балаларын тәрбиәләгән ҡатынға алимент түләүҙән баш тарта һәм суд тарафынан уға үҙ фамилияһын биреүгә ҡаршы ҡарар ҡабул ителһен өсөн генетик экспертиза яһауҙы талап итә.
Бер өләсәй ейәнсәренең яҙмышы хаҡында борсолоп беренсе тапҡыр ғына мөрәжәғәт итмәй. Депола трамвай водителе булып эшләгән ҡатынды борсоған мәсьәләне көҙҙән алып хәл итергә тырышабыҙ.
Иртәгә – Балаларҙы яҡлау көнө. Был байрам илдә илле йыл билдәләнә. Ошо айҡанлы быйыл ғинуарҙа Рәсәйҙә «Ҡайнар йөрәк» тигән фестиваль иғлан ителгәйне. Ил төбәктәренә ике номинация буйынса, йәғни батырлыҡ һәм спорт, ижад өлкәһендә ниндәйҙер ҡаҙаныштарға өлгәшкән йәки тормош ауырлығын еңеп сыҡҡан, ошо уҡ ваҡытта үҙҙәрен шәхес булараҡ күрһәтә алған етем йәки инвалид балаларҙың исем-шәрифтәрен ебәреүҙе һорағайнылар. Рәсәйҙең Бала хоҡуҡтарын яҡлау буйынса вәкиле Павел Астаховтың үтенесе буйынса был эште башланыҡ. Республика ҡалаларынан һәм райондарынан ошондай балаларҙы эҙләп, исемлек төҙөйбөҙ. Йөҙҙән ашыу анкетаны уҡығандан һуң, бик ныҡ тулҡынландым. Исемлекте ныҡлап ҡарағандан һуң, кемдеңдер йәше үткәнлеге һәм башҡа сәбәптәр асыҡланды. Һөҙөмтәлә 65 ҡыҙ һәм малайҙы һайлап алдыҡ. Улар – янған йорттан өлкәндәрҙе, һыуға батыусы кескәйҙәрҙе ҡотҡарыусы һәм башҡа батырлыҡ ҡылған 12–14 йәшлек ҡыҙҙар һәм малайҙар. Әле республикала һәр ошондай бала тураһында репортаждар төшөрөлә һәм Башҡортостан телевидениеһында күрһәтелә.