Һуңғы йылдарҙа республикала яңы тыуған сабыйҙарҙың үлем күрһәткесе кәмеүгә барһа ла, ҡайһы бер райондарҙа был тәңгәлдә алға китеш юҡ. Өҫтәүенә ҡайһы бер төбәктәрҙә был хәл ҡырҡыуланғандан-ҡырҡыулана ғына.
Башҡортостандың Һаулыҡ һаҡлау министрлығы мәғлүмәттәренә ҡарағанда, республикала сабыйҙар үлеме 7,6 промилле тәшкил итә (Рәсәйҙә — 8,4, Волга буйы федераль округында — 8,2). Әммә былтыр Салауат (1000 сабыйға 18,7 үлем осрағы), Нуриман (17,2), Ҡыйғы (18,3) райондарында үлемдең ике тапҡырға артыуы менән һис килешеп булмай. Сабыйҙар араһында үлем күрһәткесе һаулыҡ һаҡлау тармағының ниндәй хәлдә булыуын күҙ алдына баҫтыра.
Ҡатын-ҡыҙҙың сәләмәтлеге — айырым етди тема. Республикала былтыр бала табыу осраҡтарының ни бары 30 процентҡа яҡынын “нормала” тип иҫәпләп булһа, Ҡыуатов исемендәге республика дауаханаһының акушер-гинекология бүлексәһендә был күрһәткес 2,7 процент ҡына тәшкил иткән. Һаулыҡ һаҡлау министры Георгий Шебаевтың әйтеүенсә, тармаҡтың иң “ауыртҡан” урыны — медицина хеҙмәткәрҙәренең етешмәүе. Мәҫәлән, акушер-гинекологтар менән 60, неонатологтар менән — 50, педиатрҙар менән — 63, реанимотолог-анестезиологтар менән 47 процентҡа ғына тәьмин ителгәнбеҙ.
Шул сәбәпле быйыл медицина вуздарына маҡсатлы йүнәлеш буйынса килешеүҙәргә ҡайһы бер үҙгәрештәрҙең индереләсәген дә хәбәр итте министр. Килешеү төҙөгән яҡтар үҙҙәренең бурыстарын үтәмәгәндә штраф һалыу менән бәйле аныҡ саралар күреләсәк. Ултырышта яңы тыуған сабыйҙар өсөн мобиль реанимация комплекстары менән йыһазландырылған “Ашығыс ярҙам” автомобилдәрен арттырыу ҙа ҡаралды.
Хөкүмәт ултырышының көн тәртибендәге икенсе мәсьәлә Рәсәй Президентының 2012 йылғы май указдарын тормошҡа ашырыуға, бюджет өлкәһендә эшләүселәрҙең хеҙмәт хаҡын арттырыуға арналды. Был йәһәттән ырамлы аҙымдар яһалыуына ҡарамаҫтан, ҡайһы бер тармаҡтарҙа хәлде яҡшыртыу талап ителә.
Республика биләмәһендә рөхсәтһеҙ төҙөлгән объекттарҙың ғәҙәти хәлгә әүерелеүе менән килешә алмауҙарын да белдерҙе ултырышта ҡатнашыусылар. Был тәңгәлдә тәртип булдырыу өсөн етди, оҙайлы, планлы эш талап ителә.
Рөстәм Зәки улының белдереүенсә, Ҡырым менән Башҡортостан араһында хеҙмәттәшлек буйынса килешеүгә 23 апрелдә ҡул ҡуйыласаҡ.
Башҡортостанға Ҡырымдағы Белогорский районына ярҙам итеү бурысы йөкмәтелгән. Киң ҡоласлы эште ойоштороу өсөн яуаплылыҡ беренсе вице-премьер Рәүеф Ноғомановтың иңенә һалына. Республика башлығының әйтеүенсә, 65 меңгә яҡын кеше йәшәгән Белогорский районында хәл ябай түгел. Торлаҡ фонды, коммуналь, инженер инфраструктураһы ныҡ туҙған. Хатта күп ҡатлы йорттарҙа ла үҙәк йылытыу системаһы эшләмәй, эҫе һыу юҡ.
20 йылдан ашыу ваҡыт арауығында Украина хөкүмәте социаль өлкәне бөтөнләй күҙ уңынан ысҡындырған. Район — Ҡырымда газ үткәрелмәгән берҙән-бер төбәк. Шулай итеп, республикабыҙ етәкселегенә хеҙмәттәшлек тураһында килешеү төҙөлөү менән ышанысты аҡлау өсөн башкөллө эшкә сумырға тура киләсәк.