Республика буйынса Эске эштәр министры Михаил Закомалдиндың сығышы менән дә шулай булды: уны һорауҙарға күмеп ташланылар. Министрлыҡтың эше ҡатмарлы, тәбиғи, етәксенең телмәрендә лә был сағылыш тапты.
– Бер сығышта барыһын да күҙаллап булмай, шуға күрә, нигеҙҙә, депутаттарҙың минең исемгә яҙған хаттарында күтәрелгән проблемаларҙы байҡап сыҡтым, – тип тамамланы һүҙен министр.
Һорауҙарға яуап бер сәғәткә яҡын ваҡытты алды. Спикер Константин Толкачев был диалогты туҡтатырға мәжбүр булды, сөнки закондар сығарыу эше көтә ине.
Хоҡуҡи акттарҙың беренсе ҡаралғаны – Башҡортостан Республикаһы Конституцияһына үҙгәрештәр индереү. Улар иҫәбендә – республикабыҙҙың иң юғары вазифаһының исемен үҙгәртеү. Әлеге ултырышта ул өсөнсө, йәғни аҙаҡҡы, уҡыуҙа ҡаралды. Уға ярашлы, 2015 йылдың 1 ғинуарынан “Башҡортостан Республикаһы Президенты” тигән исем “Башҡортостан Республикаһы Башлығы” тип үҙгәртеләсәк. Ә ғинуарға ҡәҙәр был ике исемде лә ҡулланырға мөмкин.
Бынан тыш та республика парламенты күп кенә закондар һәм закон проекттары ҡабул итте, уларҙың иң мөһимдәре шулар:
– фатирҙың эске стеналарын үҙ белдегенә боҙоп үҙгәрткән өсөн граждандарға 3 меңдән 4 мең һумға саҡлы, вазифалы кешеләргә – 10 меңдән 15 мең һумғаса, ә ойошмаларға 20 меңдән 40 мең һумға ҡәҙәр штраф һалынасаҡ;
– ауыл хужалығы малына инәү һалыу тәртибен боҙған өсөн хужаларынан 12 мең һумға саҡлы штраф түләтеү. Был тәҡдимде индергән Баймаҡ район Советы депутаттары фекеренсә, яңылыҡ мал урлау осраҡтарын кәметәсәк;
– уллыҡҡа бала алған ғаиләләргә һәм Рәсәй Геройы исеменә лайыҡ булғандарға юридик кәңәш бушлай биреләсәк;
– дәүләт органдарының һәм урындағы үҙидараның кадрҙар менән тәьмин ителеше тураһындағы мәғлүмәт был ойошманың сайтында асыҡ күренеп торасаҡ.
Был ултырышта яңы алым да ҡулланылды: ер мөнәсәбәттәрен көйләү тураһындағы закон проектын Дәүләт Йыйылышы — Ҡоролтай тарихында тәүге тапҡыр альтернатив нигеҙҙә ҡаранылар. Беренсе проектты — республика Хөкүмәте, икенсеһен Өфө ҡала Советы тәҡдим итте. Депутаттар Хөкүмәттекен тулыраҡ, йөкмәткелерәк тип тапты һәм шуны һайланы.