Хөрмәтле гәзит уҡыусыларыбыҙ! Һеҙҙең иғтибарға арҙаҡлы ғалим Әкрәм Бейешевтең “Башҡорт телендә йөрөгән ғәрәп һәм фарсы һүҙҙәре” исемле китабынан мәғлүмәт бирә башлайбыҙ. Ул ғалимдар, тәржемәселәр, уҡытыусылар, журналистар, студенттар, уҡыусылар, тел менән ҡыҙыҡһынған һәр кем өсөн файҙалы, ҡыҙыҡлы булыр, һүҙ ҡаҙнаһын, телмәребеҙҙе байытыуға үҙ өлөшөн индерер тип ышанабыҙ.
Әкрәм Ғибәҙулла улының
“Бөртөк-бөртөк сүпләп йәдкәр ҡойҙом,
Оҙаҡ йылдар буйы интегеп.
Тик ул йәдкәр үҙем өсөн түгел,
Данлар өсөн түгел үҙемде —
Йөрәк ҡанын һауған эшем менән
Мин үлемһеҙ иттем телемде...”
тигән шиғыр юлдарын файҙаланып, яңы проектты “Бөртөкләп йыйылған йәдкәр” тип атаныҡ.

А Аб и., фарс. — һыу.
Абадан с., фарс. — етеш, төҙөк (урын), ултыраҡ (ер).
Абруй и., фарс. — 1. йөҙ һыуы; 2. яҡшат, шөһрәт.
Ағаз и., фарс. — баш, башланыш. Ағаз ҡылыу — башлау.
Ағза и., ғәр. — 1. тәндең бер вазифа үтәгән айырым өлөшө (мәҫәлән, телмәр ағзалары); 2. бер ойошмала торған кеше (идара ағзаһы).
Аҙан и., ғәр. — намаҙға саҡырған ҡыҫҡа доға; тәҡбир. Иртәнге аҙан. Аҙан әйтеү.
Аҙап и., ғәр. — ыҙа, яфа. Аҙап күреү. Юл аҙабы.
Аҙна и., фарс. — ете көнлөк ваҡыт араһы.
Аҙра ғәр. — аҙра итеү — юҡ итеү; аҙра ҡылыу — юҡҡа сығыу.
Аждаһа и., фарс. — яман мифик зат. Аждаһа ҡойоно.
Азат с., фарс. — ирекле.
Айна и., фарс. — көҙгө.
Аҡрап и., ғәр., ҡара: ғәҡрәп.
Аҡыҡ и., ғәр. — ҡыҙыл көрән төҫтәге матур таш.
Аҡыл и., ғәр. — фекер итеү һәләте.
Алай и., ғәр. — ғәскәри берәмек; полк.
Алҡа и., ғәр. — ҡолаҡҡа таға торған биҙәүес.
Аллаһ и., ғәр. — Тәңре, Хоҙай.
Алман и., ғәр. — немец. Алман теле.
Аман с., ғәр. — 1. хәүефһеҙлек; 2. иҫән-һау, имен.
Аманат и., ғәр. — һаҡлар өсөн тапшырылған нәмә.
Амиз с., фарс. — аралаш, ҡатнаш. Амиз халыҡ.
Амин к., ғәр. — доға-намаҙҙы тамамлап әйтә торған һүҙ.
Амсар и., ғәр. — ҙур ҡалалар.
Анар и., фарс. — ҡаты ҡабыҡ эсендә уҡмашып торған ҡыҙыл емешле ағас һәм уның емеше. Анар һуты.
Ансаб и., ғәр., күпл., ҡара: нособ.
Аныҡ с., ғәр. — билдәле, асыҡ. Аныҡ мәғлүмәт.

(Дауамы бар).

Ҡыҫҡартмалар:
ғәр. — ғәрәп теленән
фарс. — фарсы теленән
лат. — латин теленән
фарс.-ғәр. — фарсы һәм ғәрәп теленән
и. — исем
с. — сифат
ҡ. — ҡылым
к. — киҫәксә
күпл. — күплек формаһы
хәб. функ. — хәбәр функцияһында
инш. — инеш һүҙ
р. — рәүеш
т. — теркәүес