— О-о-о! Бына ҡайҙа ул йән һәм тән рәхәтлеге! — тип ах та ух килеп һыуҙан сыҡҡан Алексей Котов күҙәтеп тороусыларҙың ҡыҙыҡһыныуын тағы ла арттыра төштө. Боҙ өҫтөндә тапочкала ғына баҫып торған килеш яйлап һөртөндө, еңелсә күнегеүҙәр яһап алды, унан йәнә ашыҡмай кейенде егет. Ул арала Валерий Адамян өс тапҡыр сумып сығырға өлгөрҙө.
— Әлеге халәтте кисереү өсөн бер ниндәй иҫерткес эсемлек тә, наркотик та кәрәкмәй. Боҙло һыу иҫ киткес ҡәнәғәтлек тойғоһо уята. Мин дә яңынан тыуғандай булдым, тәнемдә еңеллек тоям, — тип шунда уҡ тәьҫораттары менән уртаҡлашты ул.
Йәштәр үҙҙәре шулай алсаҡ инеме, әллә, ысынлап та, ҡышҡы бассейн үҙгәрттеме — һәр һорауға ихлас яуап бирҙеләр.
Алексейҙың 25 метрлыҡ "бассейн"ды һә тигәнсә кинәнеп йөҙөп әйләнеүен берсә көнләшеп, берсә һоҡланып күҙәттек. Ул боҙло һыуға тәүге тапҡыр 2007 йылда төшкән. Керәшен һалҡындары байрамында сирҡаныс алған да оҡшап киткән.
— Якутов исемендәге паркка аҙнаға бер тапҡыр киләм, ә өйҙә һалҡын һыу менән ҡойонам. Әммә боҙло һыуҙа йөҙөп алыуға етмәй инде! Бер ҡатмарлығы йәки сере юҡ, иң мөһиме — үҙеңде алдан әҙерләргә. Ялыбыҙҙы файҙалы үткәреүҙе дауам итәбеҙ, хәҙер мунсаға барабыҙ, — тине ул.
Ә Валерийҙың тәүге тапҡыр боҙло һыуға төшөүенә шаһит булғанбыҙ икән. Өшөп-ҡалтыранып түгел, киреһенсә, йөҙө яҡтырып, йылмайып килеп сыҡты суд приставы булып эшләгән егет.
Йәштәр китеп тә өлгөрмәне, йыйылыусыларға сәләмәтлек теләп, баҫҡыстан Эля Усаева төшә башланы. Ул да еңел генә ҡолас ташлап йөҙөп китте.
— Боҙло һыуға төшөргә былтыр тәүәккәлләнем. Һыу менән электән дуҫмын, бассейнға йөрөй торғайным. Бында килеүем иһә тәжрибәле Өфө "морж"дарына бәйле. Уларҙы бер мәл мунсала осраттым, шунда ҡыҙыҡһыныу тыуҙырҙылар. Оҙаҡ уйлап торманым, үҙемде һынап ҡарарға ҡарар иттем. Байлыҡты түгел, һаулыҡты тәү урынға ҡуйған, алсаҡ, дәртле, сәләмәт рухлы кешеләр менән аралашыу үҙе бер байрам! Бына иремде лә күндерҙем әле, бөгөн икенсе тапҡыр боҙло һыуға төштө. Ҡаланан ситтә йәшәһәк тә, ваҡыт табып ошонда киләбеҙ.
Һыуға төшкәнгә ҡәҙәр һалҡын инде, ни тиһәң дә ҡыш бит. Ә сыҡҡас, киреһенсә, тән йылына. Шунда уҡ кәйеф күтәрелә, бөтөнләй икенсе кешегә әүерелгәндәй тоям үҙемде, — тине йөҙө тағы ла балҡып, бите алһыуланып киткән Эля ханым.
Миңлекәй Батырованы һыуҙан сығып, клубта сәй эскән сағында тап иттек. "Морж"лыҡ стажы 30 йыл булған хаҡлы ялдағы ветерандың йәш сағында йөрәгенә етди операция яһалыуына ышанғы ла килмәй.
— Өс тиҫтә йыллап поликлиникаға юл тотҡаным юҡ. Табиптар үҙемде һаҡлап ҡына йәшәргә, хатта бала тапмаҫҡа ҡушҡайны. Уларҙы тыңламаным булып сыға инде... Һөнәрем буйынса кондитер инем, бер уйлаһаң, спорттан алыҫ торған кешемен. Әммә һәр ваҡыт йәйәү йөрөргә тырыштым. Хәҙер Черниковка биҫтәһенән ошо күлдәге мәкегә аҙнаһына өс тапҡыр киләм. Бынан тыш, иртәле-кисле йүгерәм, — тип хатта мине дәртләндерә биреп ҡуйҙы ул. Сәләмәтлек "вирус"ын улы Рафаэлгә лә "йоҡторған", ул да әсәһенә эйәреп йөрөй башлаған.
Өфөләге Сынығыу һәм ҡышҡы йөҙөү федерацияһы коллективының киң күңелле, ихлас, дәртле кешеләрҙән тупланыуына ҡыҫҡа ғына ваҡытта ла ышандыҡ. Әле Якутов исемендәге парктағы Һалдат күлендә йөҙөргә 120-ләп кеше йөрөй тинеләр. Иң өлкән "морж" Асия Сөләймәноваға 86 йәш булһа, иң йәшенә — ни бары алты. Кескәй Полина Трапезникова атаһы өлгөһөнә эйәргән.
— Боҙло һыу йәшлекте оҙонайта, сәләмәт ғүмер бүләк итә. Һыуҙан көс алып, күңел күтәрелеп сығаһың. Тойғоларҙы тел менән генә әйтеп аңлатырлыҡ түгел, уны һәр кем үҙенсә кисерә. Әйҙә, ҡыйыуҙар һәм тәүәккәлдәр килһен, ҡурҡмаһын, — тип башҡаларҙы ла саҡырып, мине лә күндерә яҙып йылы итеп оҙатып ҡалды "морж"дар.
Һауа торошоноң ниндәй булыуына ҡарамаҫтан, улар шаршамбы, шәмбе һәм йәкшәмбе көндәрендә иртән үк, йәғни сәғәт 9-ҙан 12-гә тиклем, йыйыла. Тағы шуныһы: тәбиғи "бассей"нда һәммә кешегә лә урын етерлек. Иң мөһиме — унда инеү өсөн түләргә кәрәкмәй.