Свердловск өлкәһендә тыуып үҫкән Борис Камалетдиновтың Өфөгә килеп төпләнеүе осраҡлы түгел. Ни тиһәң дә, уның нәҫел-нәсәптәренең еп осо республикабыҙға килеп тоташа. Танышымдың өләсәһе Борай районының Иҫке Ҡарағош тигән башҡорт ауылында ғүмер иткән икән.
Әңгәмәсем Яңы йылдан нимәләр көтә? Ошо хаҡта ҡыҙыҡһындыҡ. Борис Сәләм улының аждаһаны уҫал тип иҫәпләүселәргә әйтер фекере бар.
– Тормош үҙенсәлекле ҡоролған, ләкин һәр кем ояһын үҙенсә үрә, – тип башланы һүҙен Борис Камалетдинов. – Шәхсән миңә килгәндә, бәләкәйҙән табип булыу теләге менән яндым. Өләсәйемдең быуын ултыртыу, имләү, тәнде һылау-һыйпау кеүек һәм башҡа яҡшы һәләттәрен күреп үҫеү ҙә быға булышлыҡ иткәндер. Шифалы ҡулдары кемдәрҙе генә аяҡҡа баҫтырманы икән?! Йыш ҡына ауыл буйлап "сәфәр"гә мине лә үҙе менән бергә ала торғайны. Етмәһә, арҡамдан тупылдатып һөйөп, "минең бәпкәм ҙур үҫкәс, духтыр була", тип һәр саҡ ҡанатландырып торҙо.
Йәшәйештең үҙ ҡанундары, һин бер төрлө план ҡораһың, ә ул һис уйламағанда үҙенсә йүнәлеш алыусан. Бәлә баш өҫтөндә, ҡаза ҡаш өҫтөндә, тибеҙ. Әрмегә ҡыҙыу әҙерләнгәндә көтмәгәндә ҡазаға тарыным. Һынманым-бөгөлмәнем, киреһенсә, тырышып-тырмашып юғарыға үрмәләнем. Хәҙер бына нимә тураһында уйлайым: әгәр шул саҡта миндә шундай ажар өҫтөнлөк алмаһа, ауырлыҡтарҙы еңә алыр инемме икән?! Ғәзиз кешемдең "балам духтыр була" тигән тылсымлы һүҙҙәре ҡеүәт өҫтәне, алға әйҙәне. Яҙмышыма һис кенә үкенмәйем. "Хеҙмәттәге йәйғор һаулыҡҡа ла йоғор” тигән халыҡ әйтеме тормош девизыма әүерелде. Хеҙмәтте яратырға кәрәк, уға ытырғанып түгел, ә һөйөү аша ҡарау зарур. Һуңынан Кисловодск ҡалаһында массаж яһаусыға уҡыным, бөгөн ошо йүнәлештә эш итәм, һөнәремде яратам...
Бына ошо Аждаһа йылының йәйге селләһендә тирә-яҡҡа тәүге ауазын ишеттергән малайҙың йөрәгенең ҡаты булыуы мөмкинме? Әлбиттә, юҡ. Тота килеп аждаһаларға кире баһа биреү менән бер нисек тә килешмәйем. Минән дә йомшаҡ күңелле зат юҡ был донъяла. Уларҙың дорфа һәм яһилдан бигерәк ярҙамсыл, итәғәтле кеүек күркәм сифаттарға эйә булыуын беләм. Ололарҙы ихтирам иткән һәм кеселәрҙе иғтибарынан һымаҡ ныҡышлыҡ та кәрәк.
Яңы йылды һәр ваҡыт ҙур түҙемһеҙлек менән көтөп алам. Мосолмандарҙа "Юрағаның юш килә" тигән мәҡәл бар. Табип булараҡ, иң башта Хоҙайҙың һаулыҡтан айырмауын һорайым. Сәләмәтлек яҡшы икән, бүтәне табыласаҡ.
Яҡындарым – Данис улым, Әлиә ҡыҙым һәм Зәлиә кәләшем — менән бергә ошо күркәм байрамды күңелле һәм иҫтә ҡалырлыҡ итеп ҡаршыларға тырышабыҙ. Тиҙҙән минең йылым башлана, уға ҙур өмөттәр бағлайым, яҡшы буласағына тулыһынса ышанам.
Риүәйәт буйынса, бер быуат буйы әҙәм балаларының күҙенә салынмайынса ҡайҙалыр йәшеренеп ятҡан йылан аждаһа ҡиәфәтен ала, имеш. Ошо мифик заттың иң күркәм сифатын теләйем! Гәзит уҡыусылар, уның кеүек оҙон ғүмерле булығыҙ!