Башҡортостанда һәләтле балалар «Аврора» төбәк үҙәгендә шөғөлләнергә мөмкин

Башҡортостанда Рәсәй һәм халыҡ-ара кимәлдәге олимпиадаларҙа яҡшы һөҙөмтәләр күрһәткән балалар һаны йылдан-йыл арта. Әгәр 2019/2020 уҡыу йылында олимпиадаларҙың йомғаҡлау этабында республика исеменән 82 ҡатнашыусы сығыш яһаһа, 2024/2025 йылдарҙа иһә 153. Республиканан еңеүселәр һәм призерҙар һаны ла арта. 2023 йылда – 36, 2024 йылда – 52, 2025 йылда 57 награда. Башҡортостан Башлығы үҙенең телеграм-каналында ошондай мәғлүмәттәр менән бүлеште.

Уҡыусыларҙың Бөтә Рәсәй олимпиадаларында еңеү яулауы, илдең теләһә ниндәй юғары уҡыу йорттарына имтиханһыҙ инеүе – уларҙың тырышлығы һәм таланты, шулай уҡ Башҡортостанда һәләтле балалар менән системалы эшләү һөҙөмтәһе, тип билдәләне республика етәксеһе.

2019 йылда Башҡортостанда «Аврора» балаларҙың һәм йәштәрҙең һәләттәрен асыҡлау, ярҙам итеү һәм үҫтереү төбәк үҙәге асылды. Уҡыусылар менән фән, сәнғәт, спорт йүнәлештәре буйынса шөғөлләнәләр.

Әйткәндәй, нефть университеты студенты, химия буйынса бер нисә халыҡ -ара олимпиада еңеүсеһе Вадим Харисов, Өфөнөң 93-сө лицейы уҡыусыһы, климаттың үҙгәреүе һәм экология мәсьәләләре буйынса халыҡ-ара олимпиадала абсолют еңеүсе София Салангина «Аврора»ла шөғөлләнгән.

Белем алыу һәм ижад өсөн яңы мөмкинлектәр «Йәштәр һәм балалар» милли проекты ярҙамында булдырыла. Үҙәк тураһында тулыраҡ мәғлүмәтте һылтанма буйынса белергә мөмкин.

https://www.bashinform.ru/news/obrazovanie/2026-02-05/v-bashkirii-odarennye-deti-mogut-zanimatsya-v-regionalnom-tsentre-avrora-4565579