Күпселек студенттар Башҡортостан вуздарын һайлай

Дөйөм алғанда, быйыл абитуриенттар Башҡортостан вуздарына уҡырға инеү өсөн 206 584 ғариза биргән. Был иһә былтырғыға ҡарағанда дүрттән бер өлөшкә күберәк, тип хәбәр итте Башҡортостан Башлығы.

«Был беҙҙең өсөн бик мөһим күрһәткес булып тора. Өфөнөң юғары уҡыу йорттары йәштәребеҙҙе нығыраҡ йәлеп итә. Быны мин юғары уҡыу йорттары етәкселеге һәм коллективтары, республиканың идара итеү командаһы, алдынғы предприятиеларыбыҙ күп көс һалған системалы эштең һөҙөмтәһе тип иҫәпләйем», — тип яҙҙы Радий Хәбиров социаль селтәрҙәге сәхифәһендә.

Башҡортостандың дүрт вузы «Өҫтөнлөк 2030» программаһында ҡатнашты, тип иҫкә төшөрҙө ул. Бынан тыш, «Йәштәр һәм балалар» милли проекты сиктәрендә Өфөлә илдә иң яҡшы кампустарҙың береһе төҙөлә. Быларҙың барыһы ла йәштәр үҙебеҙҙә ҡалһын һәм белем алһын, сит төбәктәрҙең һәләтле йәштәре республикабыҙға уҡырға килһен өсөн эшләнә.

Әле 10,6 мең кеше беренсе курсҡа ҡабул ителгән, тип өҫтәне Радий Хәбиров. Быйыл бөтәһе 15 523 бюджет урыны бар.

МХО-ла ҡатнашыусыларға һәм уларҙың ғаиләләренә айырыуса иғтибар бүленә. 69 яугир һәм хәрби хеҙмәткәрҙәрҙең 545 балаһы юғары уҡыу йорттарына уҡырға ингән. Хәрби хеҙмәткәрҙәрҙең күбеһе аграр университетты һайлаған, ә бына махсус операцияла ҡатнашыусыларҙың балалары йышыраҡ Өфө фән һәм технологиялар университетын һайлай.

https://www.bashinform.ru/news/obrazovanie/2025-08-08/priemnaya-kampaniya-2025-goda-v-vuzy-bashkirii-stala-odnoy-iz-samyh-massovyh-4342769