Өфөлә «Башҡортостан баш ҡалаһының йыл уҡытыусыһы – 2025» конкурсы башланды

15 ғинуарҙа Өфөлә «Башҡортостан баш ҡалаһының йыл уҡытыусыһы — 2025» һәм «Башҡортостан баш ҡалаһының башҡорт теле һәм әҙәбиәте йыл уҡытыусыһы — 2025» һөнәри оҫталыҡ конкурстарына старт бирелде. Сара Евразия фәнни-белем биреү үҙәгенең вуз-ара студенттар кампусында уҙҙы.

«Һеҙ бөйөк эшкә хеҙмәт итәһегеҙ, дәүләтебеҙҙең, республиканың киләсәген төҙөйһөгөҙ. Барығыҙға ла уңыштар теләйем, әммә конкурстың квалификацияны күтәреү өсөн яҡшы курс икәнен онотмағыҙ, ул мәңгелеккә хәтерегеҙҙә ҡаласаҡ», — тине республика мәғариф һәм фән министрының беренсе урынаҫары Светлана Антипина.

Өфө ҡалаһы хакимиәтенең мәғариф идаралығы мәғлүмәттәре буйынса, быйыл педагогтарҙың һөнәри оҫталыҡ конкурстарында 70 уҡытыусы ҡатнаша. Шуларҙың 29-ы — «Баш ҡаланың йыл уҡытыусыһы», етәүһе — «Рус теле һәм әҙәбиәте уҡытыусыһы», ә унауһы «Башҡорт теле һәм әҙәбиәте уҡытыусыһы» номинацияһында көс һынаша. Йәш белгестәр өсөн айырым номинация бар. Быйыл 24 йәш уҡытыусы үҙ оҫталығын күрһәтергә теләк белдергән.

Жюри составына республиканың юғары уҡыу йорттары ғалимдары, баш ҡаланың дөйөм белем биреү ойошмалары етәкселәре, уҙған йылдарҙағы һөнәри конкурстарҙың лауреаттары һәм еңеүселәре инде.

Хәтерегеҙгә төшөрәбеҙ, «Башҡортостан баш ҡалаһының йыл уҡытыусыһы» конкурсы – 1997 йылдан, ә «Башҡортостан баш ҡалаһының башҡорт теле һәм әҙәбиәте йыл уҡытыусыһы» 2004 йылдан алып ойошторола. Был осорҙа конкурстарҙа дүрт меңгә яҡын уҡытыусы ҡатнашҡан.

https://www.bashinform.ru/news/obrazovanie/2025-01-16/v-ufe-startoval-konkurs-uchitel-goda-stolitsy-bashkortostana-2025-4085953