Башҡортостан «Иннопром»да бер нисә мөһим килешеү төҙөнө

«Иннопром-2026» халыҡ-ара сәнәғәт күргәҙмәһендә Башҡортостан хеҙмәттәшлек һәм уртаҡ инвестиция проекттары тураһында бер нисә килешеү төҙөнө. Был турала БР вице-премьеры – сәнәғәт, энергетика һәм инновациялар министры Александр Шельдяев хәбәр итте.

Иң эре проект — Өфө трансформатор заводын яңыртыу. «ЭРСО холдингы» акционерҙар йәмғиәте менән килешеү заманса трансформатор ҡорамалдары етештереүҙе киңәйтеүҙе күҙ уңында тота. Инвестициялар 1,4 миллиард һум тәшкил итәсәк. Был заводҡа ҡеүәтен арттырырға, республиканың илдең алдынғы сәнәғәт үҙәктәренең береһе булараҡ позицияһын нығытырға мөмкинлек бирәсәк.

«Флагком» яуаплылығы сикләнгән йәмғиәте менән икенсе инициатива Туймазыла һыуытыу-парландырыу аппараттары производствоһын киңәйтеүгә ҡағыла. 2030 йылға тиклем асылырға тейешле яңы майҙансыҡта 30 эш урыны булдырыласаҡ. Әле проектлау эштәре һәм ер участкаһын рәсмиләштереү буйынса эш алып барыла. Объектҡа инвестициялар 350 миллион һум тәшкил итәсәк.

Бынан тыш, Башҡортостан төбәк-ара хеҙмәттәшлекте киңәйтте. Ҡарасәй-Черкес, Луганск Халыҡ Республикаһы, Силәбе өлкәһе һәм Сыуашстандың профилле министрлыҡтары менән үҙ-ара эш итеү тураһында килешеүҙәргә ҡул ҡуйылды. Яҡтар тәжрибә уртаҡлашырға, кооперацияны үҫтерергә һәм бергәләп импортты алмаштырыу мәсьәләләрен хәл итергә һөйләшеп килеште.