Хәбиров: «Әбйәлил районындағы геологик разведкалау контроль аҫтында бара»

Башҡортостан Башлығы менән тура бәйләнештә Радий Хәбиров Әбйәлил районындағы баҡыр ятҡылығын геологик разведкалау республика хөкүмәтенең тулы контроле аҫтында бара тип белдерҙе. Иҫегеҙгә төшөрәбеҙ, «Салауат» яуаплылығы сикләнгән йәмғиәте быйыл йәй был эштәргә федераль лицензия алды.

«Улар закон нигеҙендә геологик разведкаға лицензия алды һәм уны үткәрәләр. Әлбиттә, был йәһәттән кешеләрҙең бөтә аңлайышлы борсолоуҙарын яйға һалырға тырыштыҡ һәм аңлатыу эштәре алып барҙыҡ. Шул уҡ ваҡытта экологик мәсьәләне сәйәси йүнәлешкә һалырға һәм республикалағы хәлде тотороҡһоҙландырырға маташҡан дошман көстәре лә бар. Беҙ халыҡты уларҙан һаҡланыҡ, кешеләргә радиоактив ятҡылыҡтарҙың, чума вирусының һәм башҡаларҙың юҡлығын аңлатып бирҙек. Был дәүләт хеҙмәткәрҙәренең, эксперттарҙың һәм политологтарҙың профессиональ эше булды. Беҙ кешеләргә был ғәмәлдең бөтә ыңғай яҡтарын аңлатып, бөтә процесс беҙҙең контролдә буласаҡ һәм тәбиғәткә һәм тирә-яҡ мөхиткә зыян килтермәйәсәк, тип ышандырҙыҡ», – тине Радий Хәбиров.

Республика етәксеһе һүҙҙәренсә, компания районды үҫтереүгә 100 миллион һумдан ашыу аҡса һалған да инде.

«Был, ысынбарлыҡта, һирәк осраҡ. Иртәгә мин «Рус баҡыр компанияһы» менән ҙур һәм бик мөһим кәңәшмә үткәрәсәкмен, сөнки геологик разведка яйлап тамамлана һәм киләһе этапта туранан-тура эшкәртеү планлаштырыла. Инвестор аңлы, аҡыллы. Был кешеләр ҡайҙалыр Ниццала йөҙөм баҡсалары һатып алмай, ә аҡсаһын Рәсәйгә йүнәлтә», — тине Радий Хәбиров.

https://www.bashinform.ru/news/social/2025-11-11/habirov-geologorazvedka-v-abzelilovskom-rayone-idet-pod-nashim-kontrolem-4462634