Башҡортостанда йомшаҡ сырҙар етештереү цехы асылды

Бөгөн Бәләбәй һөт комбинатында йомшаҡ сырҙар етештереү цехын асыу тантанаһы үтте. Башҡортостан Башлығы Радий Хәбиров предприятие коллективын ошо мөһим ваҡиға менән ҡотланы.

«Биш йыл элек беҙ ошонда ҙур эш башлағайныҡ. Бөгөн мин үҙ ваҡытында ҡарар ҡабул иткән сит ил инвесторҙарына рәхмәт белдерәм. Һуңынан бергәләп санкцияларға бәйле ҡатмарлы осор кисерҙек. Был предприятие артабан да үҫешер тип ышанам.

Бөгөн мин республикабыҙҙың ауыл хужалығы министрлығына ла рәхмәт һүҙҙәрен еткерәм. Әлбиттә, муниципаль райондың идара итеү командаһы коллективына һәм ошо предприятиеның хеҙмәткәрҙәренә ҙур рәхмәт. Бында уңайлы, яҡшы шарттар булыр тип өмөтләнәм. Ә илебеҙ һәм республикабыҙ Рәсәйҙә иң яҡшы сырҙар алыр», – тине Радий Хәбиров.

Ул шулай уҡ республиканың дәүләт наградаларын тапшырҙы, яңы цехтың производство линиялары менән танышты һәм яңы продукцияны тәмләп ҡараны.

Үҙ юлын 90 йыл элек бәләкәй генә заводтан башлаған предприятие бөгөн аҙыҡ-түлек хәүефһеҙлеген тәьмин итеүгә лайыҡлы өлөш индерә. Йыл һайын 16 мең тоннанан ашыу сыр һәм 1,5 мең тонна май – һандар үҙҙәре үк һөйләй.

«Бәләбәй» ышаныслы рәүештә Рәсәйҙең биш ярым ҡаты сыр бренды иҫәбенә инә. Предприятиеның продукцияһы илдең барлыҡ төбәктәрендә ҙур һорау менән файҙалана.

https://www.bashinform.ru/news/economy/2025-05-14/na-belebeevskom-molochnom-kombinate-v-bashkirii-otkryli-tseh-myagkih-syrov-4234329