Башҡортостанда Баҡалы ҡошсолоҡ фабрикаһы ҡатнаш аҙыҡ заводы һәм яңы корпустар төҙөй

Баҡалы ҡошсолоҡ фабрикаһы 2022 йылдың 18 октябрендә асылған. Урындағы эшҡыуар Алмаз Сәхипгәрәев быға тиклем Иҫке Ҡатай ауылындағы элекке малсылыҡ комплексын һатып алған. Дөйөм майҙаны 7200 квадрат метрлыҡ биш бина төҙөкләндерелгән, себештәр өсөн иҙән ҡорамалдары ҡуйылған, иген келәте ремонтланған һәм ҡатнаш аҙыҡ заводы файҙаланыуға тапшырылған. Бөгөн Башҡортостан Башлығы Радий Хәбиров Баҡалы районына эш сәфәре барышында ауыл хужалығы предприятиеһының эшмәкәрлеге менән танышты.

Ҡошсолоҡ фабрикаһының генераль директоры Алмаз Сәхипгәрәев һүҙҙәренсә, йомортҡа һалған 53 000 тауыҡ бар. 2024 йылдың 10 айында 16 миллион дана йомортҡа етештерелгән. Предприятиеның тәүлегенә етештереү ҡеүәте 51 000 дана йомортҡа. Проект ҡеүәте – йылына 35 миллион дана. Былтыр 10 айҙа төп аҡсаға инвестициялар күләме 89 миллион һумға еткән.

«Әлеге ваҡытта беҙ ҡатнаш аҙыҡ заводы төҙөйбөҙ, 100 мең тауыҡҡа иҫәпләнгән йомортҡа етештереү өсөн дүрт корпус һәм сорттарға айырыу комплексы төҙөү күҙаллана. Инвестиция проекты 2027 йылға тиклем иҫәпләнгән», – тине Баҡалы ҡошсолоҡ фабрикаһының генераль директоры.

Уның әйтеүенсә, продукция «Баҡалы йомортҡаһы» бренды аҫтында сығарыла, һатыу системаһы яйға һалынған.

«Бик һәйбәт ҡошсолоҡ фабрикаһы. Шәп өлгө булып тора. Йомортҡа хәҙер, үҙегеҙ аңлап тораһығыҙ, стратегик продукт. Афарин, тибеҙ, бәләкәй хужалыҡтан республика кимәленә еткәндәр», - тине Радий Хәбиров, «Башинформ» журналдарына яуап биреп.

https://www.bashinform.ru/news/economy/2025-01-17/v-bashkirii-bakalinskaya-ptitsefabrika-stroit-kombikormovyy-zavod-i-novye-korpusa-4087477