Туғандар ҡеүәтләһә, юлың уңа.

Ауыл ерендә элек-электән бөтмөр, егәрле халыҡ йәшәй. Баҙар шарттарына яраҡлашып, үҙ эшен асырға йөрьәт иткән, крәҫтиән (фермер) хужалығы ойоштороп, матур донъя көткәндәр бихисап. Шуныһы ҡыуаныслы: улар күп кенә ауылдаштарын эш урындары менән тәьмин итеп, эшмәкәрлектәрен уңышлы алып бара.

Штәнде ауылынан шәхси эшҡыуар Илгиз Карамов — ана шундай уңғандарҙың береһе. Тыуған ауылында ағас ярыу цехы асып, халыҡты ғына түгел, ҙур төҙөлөш ойошмалары менән уңайлы киле­шеүҙәр төҙөп, һәр кемен төрлө материалдар менән тәьмин итә.

— Мәктәптән һуң ҙур ҡа­лаларға йә булмаһа Себер тарафына ла юлланырға мөм­кинлек булды, әммә сит яҡтар мине үҙенә һис ылыҡтыр­ма­ны, — ти эшҡыуар. — Атай-әсәйем менән кәңәшләш­кәндән һуң, ағас эше менән шөғөлләнергә ҡарар иттем.

Әлбиттә, Илгиз Карамовҡа эшмәкәрлеген башлап ебә­реүе еңелдән булмай, кеҫә­һендә аҡсаһы ла, бай туған­дары ла юҡ уның, әммә егет ярты юлда туҡтап ҡалмай, тәүәккәлләй.

Эш һөйөүсән егет Штәнде­лә ер участкаһы алып, шунда цех төҙөй һәм башкөллө эшкә сума. Булдыҡлы егеттең баш­ланғысын хуплап, туғандары ла, дуҫ-иштәре лә ярҙамынан өҙмәй, һәр кем хәленән килгәнсә булыша. 2012 йылда иһә район хакимиәте яңы эш башлаған эшҡыуарға дәүләт ярҙамы күрһәтә, Илгиз Фәнәүи улы 100 мең һумға яҡын аҡса алыуға өлгәшә. Дәүләттән бүленгән ярҙамды фәҡәт эше өсөн генә ҡуллана.

Бөгөн Илгиз Карамов аяғын­да ныҡлы баҫып торған эшҡы­уарҙарҙан һанала, районда абруй яулап та өлгөргән ул. Әле эшҡыуар “Башҡорт­остан кирбесе”, Дүртөйлө керамика, “Ағиҙел” яуаплылығы сиклән­гән йәмғиәттәре менән йылы мөнәсәбәттәр булдырып, уңышлы ғына эш алып бара. Цех, нигеҙҙә, ойошма­ларҙы поддон менән тәьмин итә. Заказдар бик күп, бер йәмғиәт бер айҙа ғына, мәҫә­лән, бер меңдән ашыу поддон эшләүгә заказ бирә. Бынан тыш, ауыл халҡына утын да һа­та, ә бысылған таҡта ҡал­дыҡ­тарын хатта бушлай биреп ебәрә. Техникаһы ла булғас, эшҡыуар ауылдаштарына башҡа төр хеҙмәт тә күрһәтә.

Әле Илгиз Фәнәүи улы ете кешегә эш урыны булдырған. Хеҙмәт хаҡы ваҡытында түлә­нә, мәҫәлән, һәр кем, эшенә ҡарап, 18-19 мең һум тирәһе аҡса ала. Минеңсә, был — ауыл ерендә ҙур ғына табыш.

Килешеү нигеҙендә дилән­кә алып, эшҡыуар ағасты башлыса Балтас районынан ташый.
— Ҡасандыр ағас эшенә тотоноп китеүемә һис кенә лә үкенмәйем, шөкөр, эшемдән ҡәнәғәтлек тойғоһо кисерәм, — ти Илгиз Карамов. — Егет­тәр ҙә тырыш, һәр береһе үҙ эшен намыҫ менән башҡара.

Йүнселдең киләсәккә уй-хыялдары бихисап, тағы ла ҙур предприятие-ойошмалар менән килешеүҙәр төҙөргә, цехтың эшен киңәйтеп, яңы заманса ҡорамалдар менән йыһазландырырға иҫәп тота. Ә эшкә көсө-дәрте ташып торған егеттең был, һис шик­һеҙ, ҡулынан киләсәк, етмәһә, уның эшен ҡеүәтләп торған туғандары, ғаиләһе бар.