Кейемең — килбәтле, үҙең һиммәтле бул.

“Арҡайым” сауҙа йорто ҡаланың үҙәгендә, Салауат Юлаев проспектында урынлашҡан. Бер яҡтан, төрлө биҫтәләрҙән килеп йөрөргә бик тә уңайлы булһа, икенсенән, сауҙа йорто ҡала үҙәгенә үҙенсәлекле йәм һәм йәнлелек өҫтәй. Бында һәр саҡ халыҡ күп була.

Сауҙа йортонда “Магнит” магазины, кейем-һалым, көнкүреш тауарҙары, балалар өсөн тауар­ҙар һәм уйынсыҡтар һәм башҡа бутиктар, шулай уҡ дарыухана урынлашҡан. Тормош-көнкүреш өсөн кәрәкле тауарҙарҙың бер урында һатылыуы халыҡ өсөн айырыуса уңайлы. Ҡала буйлап магазин эҙләп йөрөргә түгел.

“Арҡайым”да ҡырҡлап эш­ҡыуар сауҙа эшмәкәрлеген алып бара. Уларҙың һәр береһе һатып алыусыларҙы йәлеп итеү өсөн тауарҙарҙың сифатлыһын ғына һайлап ҡайтарырға, хеҙ­мәт­ләндереү мәҙәнилеген күтә­рергә тырыша. Мәҫәлән, Алена Феликс сауҙа үҙәге асылған тәүге көндән башлап ҡатын-ҡыҙҙар өсөн өҫ кейеме һата. Рәзилә Путинцева аҫыл заттар­ға матур-матур күлдәктәр тәҡ­дим итә. Валентина Цыплухина менән Динә Мотрич үҙҙә­ренең магазинын балалар ке­йем­дәре һатыуға көйләгән. Марсель Абыҙгилдин ир-егеттәр өсөн зат­лы кейем менән сауҙа итә.
Кескәйҙәргә мауыҡтырғыс уйынсыҡтар алырға теләгән ата-әсә иһә Лилия Огурцова янына юл тота. Йәштәргә модалы сумка­ларҙы Резеда Рәхмәтул­линаның сауҙа нөктәһендә һайларға була.

Күреүебеҙсә, тауар ассортименты буйынса эшҡыуарҙар бер-береһен ҡабатламай. Магазиндан магазинға йөрөп, халыҡ әйтмешләй, баштан аяҡ кейенергә мөмкин. Аҡсаң ғына булһын.

Шуны ла әйтәйек, сауҙагәр­ҙәр тауарҙы халыҡтың зауығына тура килтереп тәҡдим иткән бер ваҡытта, уларҙың һатып алыу һәләтен дә иҫәпкә ала. Сауҙа йортона район ауылдарынан да халыҡ күп килә. Уларҙың тү­ләү мөмкинлеген ҡала халҡы­ныҡы менән тиңләштереү урынлы булмаҫ ине. Асыҡ­лабыраҡ әйтһәк, эшҡыуарҙар сауҙаны социаль йүнәлешле итергә тырыша. Был инде айырым маҡтауға лайыҡ.

Һәр кем, үҙаллы эшләүгә ҡа­ра­маҫтан, “Арҡайым” сауҙа йорто коллективы берҙәм, татыу. Ҡыйын саҡта бер-бере­һе­нә терәк булып, шатлыҡты уртаҡ­лашып йәшәйҙәр. Эшҡы­уарҙар­ҙың бер коллектив булып туп­ланыуы сауҙа йорто директоры Вәзимә Ғатауллинаның ойоштороу һәләтенән дә килә. Был вазифаны ул ун йыл дауамында башҡара. Һатыу­сыларға ла, һатып алыусыларға ла иғтибар­лы, ихтирамлы, талапсан ул. Етәк­сенең был сифаттары Сау­ҙа йортоноң дөйөм эшмәкәрле­гендә ыңғай сағы­лыш таба.