Иглин районында заманса ферма төҙөлә.

Ҡыш иртә килһә лә, Иглин районының Яңы Ҡобау ауылындағы Рөстәм Барый улы Хәбибрахманов етәкселегендәге крәҫтиән (фермер) хужалығында борсолмайҙар, сөнки мал аҙығы етерлек күләмдә әҙерләнгән.

– Быйыл уңыш мул булды. Гектарынан яҡынса 30-ар центнер иген алдыҡ, ә арпа күрһәткесе 43 цент­нерға етте. Дөйөм алғанда, бер баш малға шартлыса 40 центнер аҙыҡ тура килә. Мал да ҡураға көр инде. Бесәнде кисеп йөрөп ашайҙар, тәүлек әйләнәһенә алдарынан өҙөлмәй. Кукуруз силосы, төрлө витаминдар менән байытылған аҙыҡ бирәбеҙ, – ти хужалыҡ етәксеһенең уң ҡулы – Барый Миңлеғәли улы Хә­бибрахманов.

Рөстәм Хәбибрахманов хужалығы бынан ете йыл элек эш башлаған. Әлеге көндә 360 баш һыйыр малы бар, шуның 240-ы – һауын һыйыры. Әле тәүлегенә бер һәүкәштән 10 килограмдан ашыу һөт алалар. Аҡты Красный Восход ауылын­дағы “Һөт йәйғоро” йәм­ғиәтенә тапшыралар.

Бында эш процесы автомат­лаштырылған, шуға ла өс һауынсы өлгөрә. Тағы ла өс малсы, бер быҙау ҡараусы эшләй. Йәнә бер механизатор мал аҙығын таратыуға йәлеп ителгән.

– Эшем оҡшай, хеҙмәт хаҡы ваҡытында түләнә. Ысынлап та, малдар аҙбар­ға көр инә, шуға ла ҡышын бирешмәйҙәр. Быҙауҙарҙа ла яҡшы артым күҙәтелә, – ти ферма мөдире Әлфиә Шәрә­фетдинова.

Үгеҙ быҙауҙарҙы шунда уҡ һатып ба­ра­лар, сөнки уларҙы үҫтереү өсөн аҙ­бар­­ҙар етешмәй. Яңы ферма сафҡа инһә, уларҙы иткә ҡалдырырға ниәтләнәләр.

Был ферма төҙөлөшө “Башҡортостан Республика­һының 100 йыллығына – 100 объект” программаһына ингән. 240 баш һыйырға тәғәйенләнгән робот­лашты­рылған ферманың төп эш­тәре тамамланған: бинаның ҡыйығы ябылған, тәҙрәләре лә ҡуйылған, климат-кон-троль системаһы урын­лаш­тырылған.

– Бинаны “500 ферма” программаһы буйынса тө­ҙөй башлағайныҡ, маҡ­сатлы рәүештә бүленгән дүрт миллион һум ярҙамды алып өлгөрҙөк, аҙаҡ программа туҡтатылды. Әле төҙөлөшкә 20 миллион һум аҡса сарыф иттек. Эш ауыр бара, шуға ла икенсе йылға уны өлгөртмәүебеҙ ҙә ихтимал. Һөт арзан хаҡҡа китә. Беҙҙең кеүек бәләкәй ху­жалыҡтарҙан уны 17-19 һумға алалар, ә эре хужа­лыҡтарҙан 24-25 һумға ҡабул итәләр, сөнки улар­ҙың күләме ҙур. Ошондай тигеҙ булмаған шарттарҙа эшләү һәм үҫешеү ауыр, – ти Барый Миңлеғәли улы.

Ферма төҙөүгә һалынған аҡсаның төп өлөшө башҡа тармаҡтан алынған килем иҫәбенә төҙөлгән. Әлеге ваҡытта комбайн, трактор, автомобиль кеүек ауыл хужалығы тәғәйенләне­шен­дәге техниканы алыу өсөн түбән процентлы кредит бирмәйҙәр. Ауыл хужалы­ғына ярҙам итеү өсөн булдырылған банк та буш вәғәҙәләр биреүҙән ары китмәй. Хужалыҡ ферма төҙөү өсөн 10 миллион һум күләмендәге кредитты – 13 процент, ете миллион һум­ды 20 проценттан юғары ставка буйынса алған. Әлбиттә, бындай ҙур процентлы кредиттар хужа­лыҡтың килемен тулыһынса тиерлек йотоп тора. Был иһә ауыл хужалығы етеш­тереүенең үҫешенә аяҡ сала.