Хужалыҡ сифатлы һәм тәбиғи продукция етештерә.

“Ленинский” төбәктә эре һәм тотороҡло эшмәкәрлек алып барған хужалыҡтарҙан һанала. 2002 йылдан йәмғиәткә Рәсәйҙең һәм Башҡортостандың атҡаҙанған ауыл хужалығы хеҙмәткәре Павел Ватолин етәкселек итә. Бында, нигеҙҙә, үҫемлекселек, малсылыҡ ныҡлы үҫешкән.

— Шөкөр, уңыш-ҡаҙа­ныш­тарыбыҙ етерлек, баш­ҡаларға күрһәтерлек эш­тәребеҙ бар, шуға ла беҙгә тәжрибә уртаҡ­лашырға төрлө тарафтан килә­ләр, — ти хужалыҡ рәйесе. — Көҙ баҫыуҙан йылына ҡа­рата ярайһы ғына яҡшы уңыш йыйып алдыҡ, әле мал ҡыш­латыу эше ойош­ҡан бара.

Йәмғиәт эшсәндәре 10 мең гектарға яҡын ерҙе эшкәртеп, уны минераль ашлама менән туҡландыр­ғас, көҙ баҫыуҙар мул уңы­шы менән ҡыуандыра. Бында бөгөн өс ауылдан 176 кеше эш урыны тапҡан. Йәштәрҙең туған хужалы­ғын ташламай, ауылды һайлауына етәк­селек ҡы­уанып бөтә алмай. Ололар менән бер рәттән йәштәр ҙә йәмғиәттең үҫеше өсөн ҙур тырышлыҡ һала. Белемле кадрҙарға ла ҡытлыҡ юҡ, хатта күрше ауыл, райондарҙан да эш һорап мөрәжәғәт итәләр икән.

Йәмғиәттә төҙөлөштөң туҡта­ғаны юҡ, яңы оҫтахана һал­ғандар, хәҙер меха­низаторҙар йылы һәм иркен биналарҙа машина-трак­торҙарҙы ремонтлап, яҙ­ғылыҡҡа әҙерләй. Бынан тыш, йылы гараждар, көҙгө муллыҡты һаҡлау өсөн һыйҙырышлы келәттәр саф­ҡа индерелгән. Хужалыҡтың таҡта ярҙырыу, столяр цехтары ла бар, халыҡҡа ошо тәңгәлдә хеҙмәт тә күрһә­тәләр. Техника паркы ла бай, уны яңыртыуға аҡса йәллә­мәйҙәр.

Һөтсөлөк фер­малары заманса йыһаз­ландырылған, һөт, һыу үткәргестәр менән йы­һаз­ландырылған, ҡеүәтле һы­уыт­ҡыстар продукцияны сифатлы итеп һаҡларға мөмкинлек бирә.

“Ленинский” хужалығы тоҡом­ло һыйыр малы үр­сетеү менән дә шөғөлләнә, 1998 йылдан бында яһалма ҡасырыу эше яҡшы ҡу­йылған. Бөгөн көтөүҙә ике мең башҡа яҡын ҡара-сыбар тоҡом­ло һыйыр малы аҫрала. Сусҡа, йылҡы ла тоталар. Тоҡомло мал үрсетеү менән шөғөлләнгәс, йыл һайын йәмғиәт көтөүҙе йәш таналар менән тулыландыра, 120 баш һатыуға сы­ғарыла, иткә оҙатыла.

— Беҙҙә тырыш, уңған халыҡ эшләй. Шәхси иха­таһында ла мал тотоусылар бихисап, уларға ла һәр яҡлап ярҙам күрһәтәбеҙ, — ти Павел Леонидович. — Ярмаһы ла, бесән-һаламы ла бүленә, быҙау алып тәрбиәләү­селәр ҙә бар.

Хужалыҡтың ярымфабрикат, колбаса етештереү цехы ла уңышлы эшмәкәр­лек алып бара. Ауыл халҡын йылы икмәк менән дә туйындыралар. Шуныһы мө­һим: цех хеҙмәткәрҙәре продук­цияға төрлө өҫтәмә-ҡу­шылма, кө­сәйткестәр ҡул­ланмай, тик тә­биғи сеймалдан ғына етештерә. Бөгөн бында 20 төрлө ярымфабрикат һатыуға сығарыла, хаҡы ла әллә ни ҡиммәт түгел. Әҙер продукция “Башҡортостан продукты” сауҙа билдәһе менән район ауылдары магазиндарына оҙатыла.