Республикала дүртенсе йыл “Урындағы башланғыстарҙы яҡлау программаһы” уңышлы хәл ителә. Сәйетбаба биләмәһенә ҡараған ауылдар халҡы, урындағы депутаттар, ойошма етәкселәре, хеҙмәткәрҙәре, эшҡыуарҙар ҡатнашлығында уҙған дөйөм йыйылышта ла ошо хаҡта һүҙ барҙы.

Ауыл биләмәһе башлығы Айрат Сәйфуллин, йыйылышты асып, көн тәртибе һәм был мөһим программа менән ҡыҫҡаса таныш­тырҙы, күп­тән түгел трактор һәм уға ҡора­мал­дар алып, әлеге көндә техника­ларының изгелеген күргән Имән­дәш, Красноусол ауыл билә­мә­ләрен атап үтте.


Шуларҙы иҫәпкә алып, Сәйет­баба ауыл биләмәһе халҡы иң тәү­ҙә яңы трактор алыу мәсьә­лә­һен мөһим тип тапты. “Сәйетбаба башҡорт тарихи-мәҙәни үҙәге” баш белгесе Рәзим Мәүлитҡолов сығыш яһап, был программаны ҡабул итеү заман талабы, Хөкүмәт ярҙам ҡулы һуҙа икән, беҙ ҙә үҙ сиратыбыҙҙа уға ыңғай яуап бирергә тейешбеҙ, тип трактор алырға тигән тәҡдимде хупланы. Залда йыйылған халыҡ та үҙ тауышын белдереп, уның фекерен йөпләне.

Йыйылышта балалар ҙа ҡатнаш­ты. Сәбәбе – улар тигеҙ, матур юлдан рәхәтләнеп мәктәпкә барғы­лары килә, әгәр юл таҙар­тылһа, еңелгә төшәсәк. Ошо уйҙарын уҡыусылар һүрәттәрендә лә сағылдырған. Тап шуға улар ҙа ололар менән бер рәттән ихлас тауыш бирҙе.

Шулай итеп, киләһе йылдағы “Урындағы башланғыстарҙы яҡлау программаһы”нда ҡатнашып, Сәйет­баба ауыл биләмәһе өсөн 1 миллион 450 мең һумлыҡ “МТЗ-82” тракторы һатып алырға ҡарар ителде. Республика бюджетынан бер миллион һумлыҡ грант бүленәсәк. Ҡалған сумманы – 150 мең һумды урындағы бюджеттан, 150 мең һумын – бағыусыларҙан һәм 150 мең һумын халыҡтан йы­йырға ҡарар ителде. Тракторҙан аҡ­са артып ҡалған осраҡта, уға өҫ­тәлмә ҡорамалдар йәки запчас­тар һатып алыу тәҡдиме лә ха­лыҡтың күпселегендә яҡлау тапты.

“Урындағы башланғыстарҙы яҡлау программаһы”ның эшен йәнләндереү һәм алып барыу өсөн инициативалы төркөм төҙөлдө.