“Башсельхозтехника” дәүләт унитар ауыл хужалығы предприятиеһында “Беларусь-1221.3 Tropic” тракторы йыйыла башланы.

Былтыр “МТЗ-82” тракторын үҙебеҙҙә сафҡа индереп тәжрибә туплаған егет­тәргә яңы өлгөнө йыйыуы ҡыйын бул­маған. Техникаға 110 литрлы өҫтәмә яғыулыҡ һауыты ҡуйылған. Һөҙөмтәлә бөтәһе 250 литр солярка һыя. Был баҫыуҙа тотҡарлыҡһыҙ эшләргә мөм­кинлек бирә. Тракторҙың йәнә бер өҫ­төнлөгө – уның һыуытҡыс блогы ҙу­райтылған. Был иһә ауыр эштәрҙе башҡарғанда ла моторҙың ҡыҙмай эшләүенә булышлыҡ итә.

Башҡортостандың ауыл хужалығы министры Илшат Фәзрахманов үҙ сығы­шында Европа илдәрендә ошондай цехтарҙың электән эшләп килеүен һәм уның файҙалы булыуын билдәләне. “Башсельхозтехника” – Рәсәйҙә “Беларусь-1221.3 Tropic” тракторын йыя башлаған беренсе предприятие. Ул “ДТ-75” һәм “Алтай Т4” тракторҙарын алмаштыра, һатыу хаҡы йәһәтенән дә отошло, сы­ғымдар аҙыраҡ китә. Был техниканы үҙебеҙҙә йыйыу тәҡдиме менән Илеш эшсәндәре сыҡҡан. Тракторҙар хаҡының бер өлөшө республика ҡаҙнаһынан субсидия ярҙамында ҡапланасаҡ.

Башҡортостанда йыйылған техника өҫтәмә заманса агрегаттар менән йыһаз­ланды­рыла. Улар ер эшкәртеү эшендә байтаҡ сығымды кәметергә булышлыҡ итәсәк.

Илшат Илдус улы киләсәктә лә ауыл эшсәндәренә яңы техника алыуға ярҙам буласағын билдәләне.

– Быйыл был маҡсатҡа республика ҡаҙнаһынан 1,150 миллиард һум аҡса бүленде, – тине ул. – 2019 йылда тағы 800 миллион һум күләмендә

субсидия биреү ҡаралған. Былар бөтәһе лә ауыл хужалығы эшсәндәренә техника алыуға киткән сығымды ҡайтарыуға тотоноласаҡ.