Республика баҫыуҙарында киләһе уңышҡа нигеҙ һалыу өсөн көрәш ҡыҙғандан-ҡыҙа. Ауыл эшсәндәре һабан эштәрен юғары агротехник кимәлдә һәм ваҡытында атҡарып сығыу теләге менән йәшәй. Күп кенә хужалыҡтар яҙғы культуралар менән бер рәттән шәкәр сөгөлдөрө, көнбағыш, ҡарабойҙай, картуф та сәсә. Техникаһын, орлоҡто, ашламаны хужаларса әҙерләгән, һәр участкала хеҙмәтте ентекле уйлап ойошторғандарға уңыш, әлбиттә, йылмаясаҡ.
Был матур көндәрҙә Мәләүез районы игенселәре лә бәрәкәтле ерҙең көсөн арттырыу хаҡында оло хәстәрлек менән йәшәй. "Иртә сәсһәң, уңырһың" тигән уй-теләк менән таң һарыһынан баҫыуға ашыға улар.
"Ашҡаҙар" ауыл хужалығы кооперативының йәйрәп ятҡан ерҙәренә килеп еткәндә, мул итеп ашланған баҫыуҙы алты сәсеү агрегаты иңләй ине. Механизаторҙар ялға туҡтаған арала улар янына йүнәлдек.
– Хәйерле көн, егеттәр! – Район хакимиәтенең ауыл хужалығы идаралығы начальнигы Александр Баранов һүҙен ҡыҫҡа тоторға тырышты. – Тәбиғәт йылы көндәре менән ҡыуандырып, тиҙ арала эште теүәлләргә өндәй кеүек. Тупраҡ йылы, өлгөргән, һәйбәт эшкәртелгән. Эшегеҙ еңел булһын, әйҙәгеҙ, киләһе уңышҡа өмөт итәйек.
Егеттәрҙең күңеле көр, кәйефе лә күтәренке. Бойҙай сәсәләр икән, бер агрегат көнөнә 80-100 гектар майҙанға орлоҡ һала. Бер аҙ ял иткәндән һуң агрегаттар урындарынан ҡуҙғалды, баҫыу өҫтө көслө мотор тауыштарына күмелде. Яҙғы көндөң һәр сәғәте, һәр минуты ҡәҙерле шул.
– Тиҙҙән сәсеүҙе тамамларға уйлайбыҙ. Әлбиттә, был бик һирәк күренеш, элек ҡыр эштәрен ай аҙағында ғына теүәлләй инек, – ти хужалыҡ директоры Илдус Хәлитов. – Көндәрҙең ҡороға китеүен иҫәпкә алып, егеттәр менән кәңәшләшеп, темпты арттырырға булдыҡ.
"Ашҡаҙар" төбәктә иң күп иген игеүсе хужалыҡтарҙан һанала. Һөрөнтө ерҙәре генә 14 мең гектар тәшкил итә. 200-ҙән ашыу кеше эш менән тәьмин ителгән. Ауыл хужалығы техникаһы паркы ла бай, йыл һайын тиерлек яңырталар.
Райондың "Старт" крәҫтиән (фермер) хужалығына ла һуғылып, эш барышы менән таныштыҡ. Беҙ барғанда механизаторҙар 80 гектар майҙанда борсаҡ сәсә ине. Уларға тағы ла бойҙай, шәкәр сөгөлдөрө, көнбағыш һәм башҡа культуралар сәсергә ҡалған. Эш ике сменала бара, ашатыу ҡаралған. Етәксе Илдус Шәрипов игенселәрҙең эшенән ҡәнәғәт булыуын йәшермәй.
– Кемделер айырып маҡтайһы килмәй, һәр береһенең хеҙмәте юғары баһаға лайыҡ, – ти ул. – Уларҙың тырышлығы менән киләһе уңышҡа нигеҙ һалына ла инде.
Хужалыҡта ололар менән бер рәттән йәштәр ҙә етерлек, киләсәктә эшсе ҡулдарға ҡытлыҡ булмаясаҡ. Уңайлы шарттар булдырылғас, һәр кем эшкә ҙур теләк менән йөрөй. Хеҙмәт хаҡы, мәҫәлән, бөгөнгө көндә 18 мең һум тәшкил итә. Ауыл эшсәндәренә ял итеү мөмкинлеге лә бар, күптәр республиканың "Янғантау", "Красноусол" шифаханаларында һаулығын нығытҡан.
– Етәксенән уңдыҡ, үҙе лә ер тип йәбешеп ята. Күп кенә етәкселәр баҫыуға ла килеп урамай, ә беҙҙең хужа һәр саҡ һабанда. Үҙе лә тракторға ултырып ер һөрөргә өлгөрә, сәскесте йүнәтергә лә ваҡыт таба, – ти хужалыҡтың алдынғы механизаторы, 1975 йылдан бирле трактор штурвалын ҡулынан ысҡындырмаған Әкрәм Сәғитов.
Әйткәндәй, һуңғы өс йылда хужалыҡҡа 30 миллион һумлыҡ техника һатып алғандар. Үҫтерелгән продукцияны һаҡлау өсөн яңы ике келәт, йәшелсә һаҡлағыс, оҫтахана төҙөгәндәр.
Бына шулай Мәләүез районының һәр хужалығында ла сәмле эш ҡайнай. Көнө йыл туйҙырырлыҡ мәл бит хәҙер, игенселәр быны яҡшы аңлай. Шуға ла уларҙың һәр береһе бураҙнала хеҙмәт өлгөһө күрһәтә, йомарт ерҙән мөмкин тиклем күберәк уңыш алыу өсөн бөтөн көсөн һала.