Ауыл ерендә төрлө кешене осратырға мөмкин. Берәүҙәр бөтә нимәгә ризаһыҙлыҡ белдерһә, икенселәр, йәшәүҙән йәм табып, күңеленә ятҡан шөғөлдө үҙ итә. Ҡолсора ауылы оҫтаһы Шәфҡәт Шәһивәлиевтең йортонда бар йыһаз үҙенең алтын ҡулдары менән эшләнгән. Хужаның өйөнә яҡынлашыу менән үҙе эшләгән семәрле тәҙрә рамдарын күрергә мөмкин. Ишеген асып кергәс тә, барыһы ла ҡарағайҙан эшләнгәнлеге әллә ҡайҙан күренеп тора. Күңелгә танһыҡ ағас еҫен хатта уның өҫтөнә һөртөлгән лак та еңә алмаған.

Экологик яҡтан таҙа, ныҡ ағастан эшләнгән балалар карауатында ике йәшлек Мәликә рәхәтләнеп йоҡлай. Атайҙары яһап биргән креслола Рөстәм менән Әбделмөлөк кинәнеп ултырып телевизор ҡарай йә, журнал өҫтәлен яҡынайтып, төрлө уйындар уйнай. Ҡатыны Ләйсән ҡыҙы Нәркәс менән аш-һыу бүлмәһендә атайҙары эшләп ултыртҡан өҫтәлдә төрлө тәмлекәстәр әҙерләй.
Шәфҡәт Яхъя улының ҡул эштәренә әүәҫлеге олатаһынан килә. Бала саҡтан ағастан төрлө әйберҙәр яһау теләге менән яна, әммә хыялы кәләш алып, йорт һалып сыҡҡас ҡына тормошҡа аша. Яңы өйҙө башлыса үҙенә төҙөргә тура килә, тәҙрә, ишектәрҙе үҙе семәрләй, тәҙрә рамдарына башҡаларҙыҡынан айырмалы төрлө биҙәктәр һала. Өйҙәренә күсеп, элек йәшәгән йортто оҫтаханаға әйләндергәс, уның ағастан әйберҙәр эшләүгә теләге ҡайтанан барлыҡҡа килә. Станок һатып ала, аҡрынлап йорт йыһаздары яһай башлай. Иренең оҫта ҡуллы булыуын белгән ҡатыны ла уны дәртләндереп тора, кәңәштәрен бирә. Йортҡа кәрәкле йыһаздар теҙмәһе яҙыла, хужа күңелен һалып башҡара бара. Үҙенә тип эшләнгән әйберҙәр күҙ нуры аша үтеп, зауыҡ менән яһалғанға күрә, матур ҙа, күркәм дә килеп сыға, иң мөһиме — шундай уҡ берәүҙә лә булмай. Ауылдашының эшен күреп, оҫтаға заказ биреүселәр табыла. Кемгәлер ултырғыс, икенселәренә һандыҡ кәрәклеге асыҡлана. Уларҙың теләген дә үтәй егет, аҙ булһа ла аҡсаһы ла ғаилә ҡаҙнаһын тулыландыра.
“Мебель эшләү буйынса үҙ эшеңде асып ҡарарға теләгең бармы?” тигән һорауыма, әңгәмәсем былай тип яуапланы:
— Эш башлау өсөн аҡса кәрәк. Кәрәкле станоктар һатып алыу өсөн ҙур сығым талап ителә. Әлегә күңел ҡушыуы буйынса ғына башҡарам, аҙаҡ күҙ күрер. Тиҙҙән ғаиләбеҙ тағы ҙураясаҡ, бишенсе сабыйыбыҙҙы көтәбеҙ. Балалар бер аҙ үҫә төшкәс, улдарым ҡул араһына инә башлағас, бәлки, уйлап та ҡуйылыр, — тине Шәфҡәт Яхъя улы.
Ысынлап та, йорт йыһазын тота һалып эшләп тә булмай, тәүҙә һыҙмаларын һыҙырға, үлсәмен билдәләргә кәрәк. Бөгөн ағастан яһалған әйберҙәр ни тиклем сифатлы булыуға ҡарамаҫтан, халыҡ үҙ зауығына ярашлы заманса материалдарҙан эшләнгәненә өҫтөнлөк бирә. Шуға күрә әңгәмәсемдең һүҙҙәрендә лә хаҡлыҡ юҡ түгел. Әммә шуныһы бәхәсһеҙ — алтын ҡуллы оҫтаның эш өлгөләре һәр саҡ ҙур ихтыяж менән файҙаланыла. Киләсәктә Ҡолсора халҡы Шәфҡәт Шәһивәлиев яһаған йорт йыһаздарын һатып алыр, оҫтаның даны төрлө тарафтарға таралыр тигән ышаныста ҡалайыҡ.