Ике ҡатлы мөһабәт бинаның заманса ҡорамалдар менән йыһазландырылған, иркен, яҡты икмәк цехында һәр йорт өҫтәлендә көн дә түрҙән урын алған изге ризыҡтың ағын да, ҡараһын да, бойҙай ононан да, арыштан да тарттырылғанын бешерәләр. Бында тәүлегенә биш мең дана ҡалас, шулай уҡ 30-ҙан артыҡ башҡа төр ҡамыр ризыҡтары етештерелә.

Улар Красноусолдың 15-тән ашыу сауҙа урынында һәм Стәрлетамаҡ ҡалаһы кибеттәрендә һа­ты­ла.Теләүселәргә заказ буйынса һәр төрлө эслек менән бәлеш, сәксәк, торттар ҙа бешерәләр. Уҙған йылдың декабрь аҙағында ғына эш башлаһалар ҙа, икмәктәре халыҡ араһында ҙур ихтыяж менән файҙалана.
Әсҡәт Фәйзуллин икмәк бешереү өлкәһендә яңы кеше түгел – бынан бер нисә йыл элек үҙ эшен ҡал­дырғанға тиклем 12 йыл ошоноң менән шөғөл­ләнгән. Ҙур тәжрибә туплаған, икмәк бешереүҙең бар нескәлектәрен ентекле өйрәнгән эшҡыуар: “Бөтә серебеҙ шунда: беҙ икмәкте боронғоса, өлә­сәй­ҙәр рецебы буйынса – ҡомалаҡтан яһалған әсет­кенән, икмәк бешереү технологияһынан ситкә тайпылмайынса, теүәл үтәп бешерәбеҙ. Шуға ла ул тәмле, мамыҡтай йомшаҡ булып күпереп тора, бо­ҙолмайынса оҙаҡ һаҡлана, һаулыҡ өсөн дә фай­ҙаһы ҙур”, — тине цех менән таныштырғанда. Әйт­кәндәй, бында 12 кешегә эш урыны булдырыл­ған. Икмәкхананың технологы Рәйсә Егоровна цех­тағы ҡорамалдар, бешереү технологияһы тураһын­да эҙмә-эҙлекле итеп һөйләп бирҙе. Бында бар эш тә механик юл менән башҡарыла – ондо тоҡтан бушатыу, иләү, махсус һауыттарҙа ҡамыр баҫыу, хатта сеймал һәм әҙер продукция беренсе ҡаттан икенсегә йөк лифты ярҙамында мендереп-тө­шө­рөлә. Һауыттарға һалынған ҡамыр тейешле темпе­ратуралағы шкафтарҙа ҡабартырға ҡуйыла. Икмәк һәм башҡа ҡамыр ризыҡтары компьютер програм­маһы ярҙамында ассортименттың һәр тө­рө­нә айырым көйләнә торған ике мейестә беше­релә.
— Икмәгебеҙ башҡа етештереүселәрҙекенән айы­рылып торһон өсөн юғары сортлы ондан беше­релгән аҡ икмәккә “Ф” хәрефе яҙылған һауыт формалары эшләтеп алдыҡ. Алдағы көндәрҙә етеште­реү мөмкинлеген тағы ла киңәйтеү, кондитер цехы асыу, Красноусолда үҙ кибетебеҙҙе булдырыу уйы менән янып йәшәйбеҙ. Халыҡтың сифатлы, тәбиғи сеймалдан бешерелгән икмәккә ихтыяжын ҡәнәғәт­ләндереү өсөн башҡараһы эштәребеҙ күп әле, – тине Әсҡәт Хөснулла улы беҙҙең менән хушлаш­ҡанда.
Һәр йорттоң табын йәменә әүерелгән тәмле “Фәй­зуллин” икмәгенә ихтыяжы бар икән, тимәк, ки­лә­сәк­тә лә йүнселдең матур ғәмәленең уң булыуына шик юҡ.

Ғафури районы.