Рәсәйҙә туристарға фатир тапшырған граждандарға патент системаһын индереүҙәре ихтимал. “Беҙ патент системаһын тәҡдим иттек. Хәҙер ошо мәсьәлә өҫтөндә эшләйәсәкбеҙ”, – тип белдерҙе Дәүләт Думаһының Физик культура, спорт, туризм һәм йәштәр эше буйынса комитеты рәйесе урынбаҫары Сергей Кривоносов. Шунһыҙ ил донъя туризмы баҙарында көнәркәшлек итә алмаясаҡ, бындай хеҙмәт күрһәтеүҙә хаҡ һәм сифаттың тейешле нисбәтен булдырыу мөһим, тип иҫәпләй ул.


Әлеге ваҡытта шәхси сектор ме­нән ҡунаҡханалар үҙ-ара конкурент булып тора. Фатир һәм апартаменттар яртылаш законлашты­рылған юл менән тапшырыла, сифатлы хеҙмәт күрһәтелмәй, ҡунаҡтарҙың хәүефһеҙ­леге лә тәьмин ителмәй. Ҡайһы бер ҡалаларҙа бындай фатирҙар һаны ҡунаҡханалар бүлмәләре күләме ме­нән тиңләшкән. Уйлап ҡараһаң, “кү­ләгә” ысул менән фатирҙы ҡуртымға биреү хеҙмәте осһоҙ булырға тейеш кеүек. Әммә уның киреһе күҙәтелә. Бигерәк тә сит ил туристарын “һауып” ҡалырға тырыша ҡайһы бер йүнсел­дәр.
Быйыл илдә ҙур ваҡиға буласаҡ – футбол буйынса донъя беренселеге. Ошоға бәйле уйындар үтәсәк ҡалаларҙа шәхси торлаҡҡа ҡуртым хаҡы ҡырҡа күтәрелгән. Уларҙың ҡай­һы берҙәре иҫ китмәле. Мәҫәлән, Саранскиҙа ошо мәлдә фатирҙы ике аҙнаға ҡуртымға алам тиһәң, 2,5 мил­лион һум сығарып һалырға тура киләсәк икән.
Был тармаҡтағы проблема туризм үҫешкән сит илдәрҙә лә бар. Ҡайһы берҙәрендә фатирҙы ҡуртымға биреү тыйылған йә сикләнгән. Миҫалға Амс­тердамды алайыҡ: унда торлаҡ 30 көндән дә ашыу ваҡытҡа тапшырыл­маҫҡа тейеш. Шул уҡ ваҡытта милек хужаһы мотлаҡ теркәлергә бурыслы, дәүләт яғынан да контроль бул­дырылған.
Рәсәйҙә иһә бындай тәртип урынлаштырыу өсөн оҙайлы ваҡыт талап ителәсәк. Әлеге ваҡытта тәүге аҙым­дар яһала. Ошо маҡсатта яңыраҡ Дәү­ләт Думаһы ҡунаҡханаларҙы классификациялау буйынса закон проектын икенсе уҡыуҙа ҡабул итте. Унда шәхси фатирҙы ҡуртымға биреү тураһында һүҙ булмаһа ла, киләсәктә уға төҙәтмәләр индерергә була, иң мөһиме – башлап ебәреү, тип иҫәп­ләй эксперттар.
Закон проекты ниндәй яңылыҡтар индерә? 50-нән ашыу бүлмәһе бул­ған отелдәр өсөн – 2019 йылдың 1 июленән, 15-тән ашыу йәшәү урыны булғандары өсөн – 2020 йылдың 1 ғинуарынан, ә башҡалар өсөн 2021 йылдың 1 ғин­уарынан классификациялау мотлаҡ буласаҡ. Әле чемпио­нат үтәсәк ун бер ҡалалағы ҡу­наҡ­ханалар мотлаҡ рәүештә классификация үтергә бурыслы.
“Йондоҙ”ҙар биреү тәртибе закон акт­тарында яҙылған. Тейешле кате­горияға тап килмәгәндәргә штраф һалынасаҡ.
Үҙгәрештәргә ярашлы, хәҙер клас­сификацияһы булған ҡунаҡханалар­ҙа хәүефһеҙ хеҙмәт күрһәтеү саралары күрелгән. Йәғни уға иҡтисад хә­үеф­һеҙлеге мәсьәләләре лә ҡағы­ла, туристарҙың әйберҙәре юғал­ған­да йә һөжүм итеү кеүек осраҡ­тарҙа яуап­лылыҡ, көтөлмәгән хәлдәр ваҡытында тиҙ ярҙам күрһәтеү кеүек мәсьәләләр көйләнгән. Законһыҙ ҡуртымға бирелгән фатирҙарҙа был талаптар күҙәтелмәй.
Классификациянан һуң ҡунаҡха­на­ларҙы даими тикшереп торасаҡ­тар. Бының өсөн инспекторҙар институтын да ойоштороуҙары ихтимал. Закон ҡабул ителһә, йәшәү өсөн хаҡтар ҡайһы бер төбәктәрҙә тө­шөүе, ә ҡайһы берҙәрендә күтәре­леүе ихтимал. Шул саҡта шәхси йорт һәм фатирҙарын ҡуртымға биргән­дәр­гә “күләгәнән” сығып, күрһәткән хеҙ­мәттәренең сифатын яҡшыртырға тура киләсәк, тип иҫәпләй депутаттар.