Тотош бер дәүләттең бәләкәй генә үҙаллы хужалығы ише көн иткән райондарҙағы халыҡтың йәшәү кимәле, көнитмеш ерҙәренең төҙөклөгө тотош ил кимәлендә сағылыш таба. Ҡалтасы районы ла – Рәсәйҙең иҡтисади үҫешенә тос өлөш индергән төбәктәрҙең береһе.
– Районда төҙөлөш, үҙгәртеп ҡороу, капиталь ремонт эштәре планға ярашлы алып барыла. Быйыл районда Республика адреслы инвестиция программаһына (РАИП) ярашлы, район мәҙәниәт йортон реконструк­ция­лауға, граждандарҙы авария хәлен­дәге торлаҡ йорттарҙан күсереүгә, ауылдарҙы газ менән тәьмин итеүгә, фельдшер-акушерлыҡ пунктын төҙөү­гә аҡса бүленде. Тәүге эштәребеҙҙең береһе – 300 кешелек мәҙәниәт йортон үҙгәртеп ҡороу өсөн яуаплылығы сикләнгән “ГазСтройСервис” подряд ойошмаһы менән контракт төҙөлдө. Объект 2018 йылда ҡулланылыуға тапшырыласаҡ. Бөгөн бинаның эске өлөшөндә, шулай уҡ вертикаль планировкалау һәм мәҙәниәт йортоноң тирә-яғын төҙөкләндереү эше алып барыла, – ти Ҡалтасы районы хакимиәте башлығы Юрий Садыров.
Шулай уҡ район граждандарҙы авария хәлендәге торлаҡтан күсереү буйынса республика программаһында ҡатнаша. Быйыл ошо маҡсатҡа 53,04 миллион һум күләмендә аҡса бүленгән. Нигеҙҙә, эштәр Ҡалтасы ауылы биләмәһендә алып барыла. Авария хәлендәге торлаҡ майҙаны 1607,3 квадрат метр тәшкил иткән күп фатирлы ете йорттан 62 ғаилә күсереләсәк. Подряд ойошмаларын һайлап алыу өсөн үткәрелгән аукцион һөҙөмтәләре буйынса генподрядсылар: район үҙәгенең Кооператив урамындағы 19-сы йорто – яуап­лылығы сикләнгән “ГеоСтрой” ойош­маһы, шулай уҡ өсәр йорт И. Низаметдинов шәхси предприятиеһы һәм яуаплылығы сикләнгән “Ҡалтасы урманы” ойошмаһы ҡарамағында.
Йәмғеһе ете объектта эш ҡайнай. Инженерлыҡ һәм төҙөкләндереү эштәре алып барыла. Йорттар йылы һәм һыуыҡ һыу, канализация, электр һәм газ менән тәьмин ителгән. Фатир хужаларының теләктәре иҫәпкә алынып, бүлмәләрҙе планировкалау, инженер хеҙмәтләндереү мәсьәләләре берлектә хәл ителә. Бөтә йорттар ҙа йыл аҙағынаса ҡулланылыуға тапшы­рыласаҡ.
Красный Холм ауылындағы 136 фатирҙы һәм социаль объектты газ менән тәьмин итеү өсөн 10 миллион һум аҡса бүленгән. Был эштәрҙе 2018 йылда тамамлау планлаштырылһа ла, генподряд ойошмаһы, газ үткәр­гес­тәрҙе һалып бөтөп, объектты быйыл уҡ тулыһынса ҡулланыуға тап­шырмаҡсы.
Оло Кәлтәй ауылында фельдшер-акушерлыҡ пунктын төҙөүгә лә аҡса бүленгән. Былтыр Кейебәк, Васильев ауылдарында ла тейешле медицина ҡоролмалары менән тәьмин ителгән фельдшер-акушерлыҡ пункттары файҙаланыуға тапшырылған. Оло Кәлтәй ауылында төҙөлөш эштәре иһә октябрҙә аукциондан һуң баш­ланасаҡ.
2015 йылда Ҡалтасы ауылында 120 балаға иҫәпләнгән балалар баҡсаһы төҙөлгән. Быйыл иһә Красный Холм ауылы халҡын ҡыуанды­рып, 110 урынға иҫәпләнгән балалар баҡсаһы ла сафҡа инәсәк, өҫтәмә рәүештә тағы ла 95 урынға иҫәпләнгән балалар баҡсаһының проект-смета документтары әҙерләнә. Бөтә был объекттарҙы төҙөү Красный Холм ауылындағы балалар баҡсаһына сират мәсьәләһен хәл итәсәк.
Ошо уҡ ауылдың 2-се киске урта мәктәбенә лә реконструкция үткәреү талап ителә. Мәктәптең дәүләт экспертизаһы тарафынан раҫланған проект-смета документацияһы бар. 2018 йылда был объект та РАИП программаһына индерелер, тигән өмөттә ҡалтасылар.
Әле Красный Холм һәм Оло Ҡасаҡ ауылдарында 41 һәм 8,6 саҡрымға иҫәпләнгән урам һыу селтәрҙәрен реконструкциялау өсөн проект-смета документтары әҙерләнә.
Ҡыҫҡаһы, “арбаңды – ҡыш, санаң­ды йәй әҙерлә” тигән халыҡ мәҡәле район хакимиәтенең хәстәрлекле эшмәкәр­леген билдәләй. Газ үткә­релгән йылы йорттарҙа ҡаршыла­маҡсы район халҡы быйылғы ҡышты. Икенсе йылда иһә фельдшер-аку­шерлыҡ пункты һәм төҙөкләндерелгән район мәҙәниәт йорто ла буласаҡ. Бына шулай ҡышҡаса үҙ эштәрен тамамламаҡсы Ҡалтасы районы. Был йәһәттән уларға ҡеүәтләү һүҙенән башҡа ни әйтәһең.

Ҡалтасы районы.