…Ҡыҫҡыс (пресс) таҡҡан “МТЗ-82” урынында ғына “тапана”. Ҡеүәтле техниканан туҡылдаған тауыштар сыға, тимәк, сираттағы бесән төргәгенең дә мәшәҡәте бөтөп килә – ҡорамал мал аҙығын бау менән сырмалай. Ул үҙ эшен башҡарған арала, беҙгә лә “ялан батырҙарына” һүҙ ҡушырға мөмкинлек сыға.

– Радионан “алдағы өс көндә боҙ борсағы, ямғыр яуа, дауыл ҡуба” һымағыраҡ ҡурҡытыуҙар ише­телгәс, бер нимәгә ҡарамай ошо яландағы эште тамамлап ҡуйырға ине, – тип, тракторынан төшөп, беҙҙең янға ыңғайлай Фиҙәрис Көҫәпҡолов.
Ысынлап та, ауыл кешеһенең бындай көндө файҙаһыҙ үткәреүе гонаһтыр ул.
– Ямғыр кәйефте төшөрһә лә, Аллаға шөкөр, төргәктәрҙе һанап бөткөһөҙ. – Тырыш егеттең йөҙөн­дә ҡәнәғәт йылмайыу сағыла.
Булдыҡлының шатлығы менән бүлешмәү мөмкин түгел – быйыл бесән бигерәк уңды шул. Мөмкинлекте файҙаланып, сап та сап.
Егет тигәндәй, Фиҙәрис ир уртаһында инде хәҙер. Ҡатыны Лиана менән өс ҡыҙ тәрбиәләй. Шәхси ихатаһы ярҙамында бынамын итеп донъя көтә.
– Ике тиҫтәнән ашыу ат бар, туғыҙ һыйырҙы һауып, һәр шаршамбы һәм шәмбе һайын Салауат ҡалаһы баҙарына һөт-ҡаймаҡ һатырға йөрөйбөҙ, – ти ул көндәлек мәшәҡәттәр хаҡында.
Беҙ Фиҙәрис менән һөйләшкән арала ҡыҙҙары, ҡаланан ҡайтҡан туғандары менән бергәләп, трактор гел боролоп йөрөмәһен тип, бакуй баштарын тигеҙләй. Фиҙә­ристең атаһы Мөхәмәт ағай, бесән еүеш була күрмәһен тип, бакуй­ҙарҙы ҡапшаштыра. Шулай тикшерә-тикшерә беҙҙең янға килеп етә.
– 74 гектар пай һәм ҡуртымға алған еребеҙ бар. Шуның 33 гектарында бесән эшләйбеҙ, ҡалғанында арыш һәм арпа сәсәбеҙ. – Мөхәмәт Хәсән улы еренең һәр үләнен, мөйөшөн яҡшы белә. – 74 йәштәмен, үҙ ғүмеремдә бындай яуым-төшөмлө йылды күргән юҡ ине. Әммә теләгең, сәләмәтлегең һәм тырышлығың ғына булһын, Хоҙай Тәғәлә мөмкинлеген бирә ул эшләргә.
Ғүмер буйы ауыл хужалы­ғында тир түккән ябай эшсенән тармаҡ бригадиры, ҙур хужалыҡ рәйесе вазифаһына тиклем күтә­релгән аҡһаҡалдың һүҙҙәренә тағы ни өҫтәйһең. Аҡһаҡал тигән­дәй, Мөхәмәт ағай һаман да “рәйес булып”, үләндең еүеш-ҡо­ролоғон ғына тикшереп йөрөмәй, улы бесәнде төргәкләп бөтөү менән, “ГАЗ-53” машинаһында мал аҙағын һарайҙарына ташый башлай. Быуындар бәйләнеше бына шулай хеҙмәттә, икмәк табыуҙа сағыла ул.
Бер килгәндә ғаиләнең килә­сәккә пландары тураһында ла һорашмай китергә ярамай.
– Маҡсат – үҫешергә! – ти Фиҙәрис. – Быйыл фермер булып теркәлергә йыйынабыҙ. Бының өсөн база бар: малдар ҡолонлай-быҙаулай, сәсергә-урырға техника паркы етешә.
Алла бойорһа, инде фермер Көҫәпҡоловтарҙың бесән эшлә­гәне йә иһә ураҡ урғаны хаҡында репортаж баҫтырырға яҙһын.
…Сираттағы бесән төргәге ергә “лып” итеп килеп төшә лә, “мин тиҙерәк ҡайта торам” тигән­дәй, ауыл яғына бер аҙ тәгәрәп ҡуя, ә трактор төтөндәр сығарып йәнә бакуй буйлап елдерә. Беҙгә лә ҡуҙғалырға ваҡыт. Эх, синоптиктарҙың фаразы был юлы тура килмәһен ине. Ана бит, буласаҡ фермерҙарға күпме бесән эшләйһе бар әле!


Стәрлебаш районы.