Бөтәһенә лә өлгөрөргә тырышыуҙан тормош ҡуласаһында зыр әйләнеп, балаларыбыҙға ысын мәғәнәһендә иғтибар бүлеп еткермәйбеҙ. Шуға күрә бөгөн заман үҙе үк алдыбыҙға балалар тәрбиәләү мәсьәләһен көн ҡаҙағына сығарҙы. Үҫеп килгән быуынға нисек дөрөҫ юл күрһәтергә, рухи ҡиммәттәргә өйрәтергә, күңелдәрендә тыуған ергә һөйөү уятырға? Күптән түгел уҙған I республика ата-әсәләр форумында ошо мәсьәләләргә яуап эҙләнде.
Ғаилә проблемалары тотош илебеҙҙә йәмәғәтселек иңенә һалынған. Ләкин, күреүебеҙсә, был ғына етмәй. Бала хоҡуҡтарын яҡлауға бәйле мәсьәләләрҙе хәл иткәндә йәмәғәт ойошмалары һәм дәүләт власы органдарының бер төптән булыуы, балалар, үҫмер­ҙәр проблемаларын иҫкәртеү һәм асыҡлауға йүнәлтелгән эштең һөҙөмтәлелеген арттырыу өсөн шарттар тыуҙырыу, ата-әсәләрҙе әүҙемләштереү мөһим. Башҡор­тостан Башлығы башланғысы менән ойошторолған форум бына ошоларҙы маҡсат итеп ҡуйҙы һәм республика төбәктәренән йәмәғәт­селек вәкилдәрен йыйҙы.
— Баҙар шарттары ата-әсә менән балалар араһындағы рухи бәйлә­неште ҡаҡшата. Ғаиләне матди яҡ­тан тәьмин итеү өсөн өлкәндәр күп ваҡытын эшкә бүлергә мәжбүр. Өҫтәмә белем биреү, спорт секциялары, түңә­рәктәр түләүлегә әйләнә бара. Ҡайҙа һуғылырға белмәгән бала Интернетҡа әүрәй. Уны виртуаль донъянан йолоп алып, рухи-әхлаҡи ҡиммәттәр ниге­ҙен­дә тәрбиәләү, күңелендә Ватанға ҡарата һөйөү уятыу зарур. Демография мәсьәләһе лә киҫкенләшә. Бөгөн әсәлек, балалыҡ, ғаилә мөнә­сәбәттәре проблемалары Мәғариф, Һаулыҡ һаҡлау, Йәштәр сәйәсәте һәм спорт, Хеҙмәт һәм халыҡҡа социаль ярҙам күрһәтеү министр­лыҡтарына, башҡа ведомстволар ҡарамағына бирел­гән. Беҙгә көн һайын был мәсьә­ләләрҙе хәл итеү менән шөғөл­ләнгән махсус дәүләт структураһы кәрәк. Ғаилә министр­лығын булдырыуға яҡынайҙыҡ, ул балаларҙы уҡытыу, өйрәтеү, тәрбиә­ләү кеүек бурыстарҙы башҡарырға тейеш, – тине йыйында Рөстәм Зәки улы.
Сараның пленар өлөшөндә Рәсәй Президенты ҡарама­ғындағы Бала хоҡуҡтары буйынса вәкил Анна Кузнецова, Федерация Сове­тының Фән, мәғариф, һәм мәҙәниәт буйынса комитеты рә­йесе урынба­ҫары Лилиә Ғүмә­рова, “Ғаиләгә социаль ярҙам итеү һәм ғаилә ҡиммәт­тәрен һаҡлау милли ата-әсәләр ассоци­ацияһы” Рәсәй йәмәғәт ойош­маһы директоры Лариса Санатовская сығыш яһаны.
Форум сиктәрендә “Сәләмәт быуын”, “Балаларҙы хоҡуҡи яҡлау”, “Ата-әсәләр тәжрибәһе. Хәҙерге заман ата-әсәләре нимә белергә тейеш?”, “Интернетта балаларҙың медиахәүефһеҙлеге” темалары буйынса аралашыу майҙансыҡтары эшләне.