Рәсәй Федерацияһы Ер кодексының 65-се статьяһына ярашлы, ерҙе ҡулланыу түләүле булыуын онотмаҫҡа кәрәк. Баҡсасылыҡ ширҡәтендәге ағзалыҡ иғәнәләрен иҫәпләү һәм түләү, шулай уҡ ҡуртым түләүҙәрен йыйыу мәсьәләһе һалым органдарының бурысына кермәй.
Баҡсасылар һәм баҡ­сасылыҡ ширҡәттәре ара­һында мөнәсә­бәттәрҙе 1998 йылдың 15 апрелен­дә ҡабул ителгән “Ком­мерцияға ҡара­маған баҡ­сасылыҡ һәм дача шир­ҡәттәре” федераль законы көйләй. Унда баҡсасылыҡ ойошмаһы ағза­ларының законда һәм ойош­маның уставында ҡаралған ағзалыҡ һәм башҡа төр иғәнәләрҙе түләргә тейешлеге яҙылған.
Әгәр баҡса өсөн ҡул­ланылған ер участкаһы кешенең милке булһа йә ул ғүмерлеккә мираҫ би­ләмәһе һаналһа, уның ху­жаһы ер һалымын һалым органы ебәргән квитанция буйынса түләй.
Граждандың милек һалы­мы түләргә тейешле объекттары иҫәбе­нә баҡ­саһында урынлашҡан кү­сем­һеҙ милке лә инә. 2015 йылдың 1 ғинуа­рынан баҡса эсендәге йорттар торлаҡҡа тиңләш­терелгән, һәм баҡса йорт­тарының 50 квадрат метр майҙаны һалымды һана­ғанда иҫәпкә алынмай. Өй ошонан бәләкәйерәк бул­һа, һалым түләнмәй. Йорт­тоң майҙаны 50 квадрат метрҙан артһа, һалым ошо күләмдән артҡан майҙан өсөн генә һалына. Әгәр кеше милек һалымы буйынса ташламаға хо­ҡуҡлы булһа, ул баҡса йорттары өсөн дә ҡулланыла.
Баҡсасылыҡ ширҡәт­тәре, ойошма булараҡ, милектә булған ер участкалары өсөн һалымды үҙаллы иҫәпләй һәм түләй. Кешенең милек һалымын баҡсасылыҡ ширҡәте кас­саһы аша түләү законда ҡаралмаған.
Ер һәм милек һалым­дары урын­дағы һалым­дарға ҡарай, һәр муниципалитет күләмен һәм таш­лама­ларҙы үҙе билдәләргә хоҡуҡлы. Милек һалымы буйынса ташламаларға хоҡуҡлылар исемлеге ҙур. Уларға Бөйөк Ватан һуғы­шы һәм хеҙмәт ветерандары, инвалидтар, черно­был­селәр, хәрби хеҙмәт­кәрҙәр һәм башҡалар инә. Өфө ҡалаһында шулай уҡ инвалид бала тәрбиәләгән ата-әсәләр, етем һәм ата-әсә ҡара­уынан мәхрүм сабыйҙар, 18 йәшкә тиклемге өс һәм унан күберәк бала­һы булған ата-әсәләр торлаҡҡа һалымдан азат ителгән.
Һалым буйынса ставкалар һәм ташламалар тураһында мәғлүмәтте Федераль һалым хеҙмәтенең сайтында (www.nalog.ru) “Справочная информация о ставках и льготах по имущест­венным налогам” электрон сервисы аша таба алаһығыҙ.
Башҡортостан Республикаһы буйынса Федераль һалым хеҙмәте идаралығының
матбуғат хеҙмәте.