“Нурис” яуаплылығы сикләнгән йәмғиәте төбәктә алдынғыларҙан һанала, бында, нигеҙҙә, малсылыҡ менән ныҡлап шөғөлләнәләр, тоҡомсолоҡ эше яҡшы ҡуйылған. Әлбиттә, үҫемлекселек тармағына ла иғтибар көслө.
Бөгөн ҡурала 1150 баш ҡара-сыбар тоҡомло һыйыр малы тотола, шуның 500-өн һауын һы­йыры тәшкил итә. Көтөүҙе йыл да йәш таналар менән тулылан­дырғас, төбәктә һөт етештереүҙә уларға тиңләшкәндәр юҡ. Миәкә районының һөт комбинатына ауыл эшсәндәре көн һайын 10 мең тоннаға яҡын аҡ оҙата. Комбинат үҙе килеп алғас, юлға сығым китмәй, түләүҙәр ҙә ваҡы­тында һәм тотҡарлыҡһыҙ баш­ҡарыла. Аҡтың сифаты юғары, шуға әҙер продукцияға баҙарҙа ихтыяж ҙур, башҡа тарафтарҙан да килешеүҙәр төҙөргә тип киләләр. Хужалыҡ ҡаҙнаһына килгән табыш хеҙмәткәрҙәргә эш хаҡы түләүгә, ремонт эштәренә, башҡа кәрәк-яраҡҡа тотонола.
“Нурис”та яһалма ҡасырыу эше һәйбәт ойошторолған, махсус белемле белгес таналарҙы ваҡытында тикшереп, кәрәкле дарыуҙар менән тәьмин итә.
Сәфәр, Шишмә ауылдарынан 33 кеше эш менән мәшғүл. Хеҙ­мәт хаҡы ваҡытында түләнә, ауыл ере өсөн 15-20 мең һум, әл­биттә, насар түгел. Әммә етәк­селек йәштәрҙең, махсус белемле белгестәрҙең етешмәүен билдәләп, “ауыл ерен үҙ иткән егет-ҡыҙҙарҙы эшкә саҡырып ҡалабыҙ” тигән теләктәрен дә еткерҙе.
2011 йылда уҡ “500 ферма” республика маҡсатлы програм­маһына ингән хужалыҡтың һөт­сө­лөк фермалары заманса йы­һаз­ландырылған, һәр береһендә һөт, һыу үткәргестәр, һыуыт­ҡыстар урынлаштырылған. Малсылар ҙа буш ваҡыттарын йылы, уңайлы бүлмәлә үткәрә. Бынан тыш һәр белгескә махсус эш урыны ла ҡаралған, шулай уҡ дөйөм ятаҡ та бар. Шуныһы һөйөнөслө: хужалыҡ киләсәктә мал һанын тағы ла арттырып, уларҙы 600 башҡа тиклем еткерергә күҙал­лай. Ә ишле малды аҫрау өсөн тейешле шарттар кәрәк. Шуға ла етәкселек ике яңы һөтсөлөк фер­маһы төҙөп ултыртҡан да инде. Яңы биналар заманса йыһаз­ландырыласаҡ, тимәк, йәмғиәт һөт етештереүҙе артабан да дауам итеп, район халҡын ғына түгел, ә республиканы ла сифатлы һөт менән тәьмин итәсәк.
— Хаҡлы ялдағы малсылар бөгөнгө эш шарттарын күреп, аптырап ҡалыр ине, моғайын. Һәр ерҙә заманса ҡорамалдар, ауыл хужалығы техникаһы ҡул көсөн алмаштырған бит. Рәхәтләнеп эшләргә генә ҡала, — ти баш зоотехник Гөлнара Рәйес ҡыҙы Ғатауллина.
Әйткәндәй, йәмғиәттең техника паркы ла бай, йыл һайын тиерлек яңыртып торалар, уның өсөн етәкселек аҡса йәлләмәй. Мәҫә­лән, һуңғы өс йылда ғына парк 10 миллион һумлыҡ заманса техникаға байыған.
“Нурис”тың ике мең гектарҙан ашыу һөрөнтө ере лә бар. Ба­ҫыуҙар буш ятмай, һәр береһе тәрбиәле. Хужалыҡтың баш агрономы Ринат Ғүмәров белде­реүенсә, көҙҙән сәселгән ужым культуралары яҡшы ҡышлаған, ҡабаттан сәсеү талап ителмәй. Апрель аҙағында уҡ ауыл эш­сән­дәре яҙғы баҫыу эштәренә төшкән. Әле улар 772 гектарҙа арпа, 55 гектарында борсаҡ, 50 гектарҙа иһә элиталы бойҙай, тағы ла люпин сәсәләр.
— Шөкөр, сәсеүгә яҡшы әҙер­лек менән килдек, орлоҡ, яғыу­лыҡ, минераль ашламаны йыл­дағыса алдан хәстәрләгәс, тот­ҡарлыҡтар булмаясаҡ, — ти баш агроном. — Халыҡтың да кәйефе күтәренке, эшкә дәрте ташып тора. Көндәр матур торһа, ҡыҫҡа ваҡытта сәсеү эшен теүәлләргә иҫәп тотабыҙ.
Игенселәр көнөнә ике тапҡыр йылы аш менән тәьмин ителгән, эшкә алып барыу-алып ҡайтыу ойошторолған. Ишле малға тейешле тәрбиә, мал аҙығы кәрәк­леген бында яҡшы аңлайҙар. Шуға ла ауыл эшсәндәре ҡышҡы осорҙа малдарҙың аҙыҡ өҫтәле мул булһын өсөн күп йыллыҡ үләндәргә өҫтөнлөк бирә. Пай ерҙәрен дә һөҙөмтәле ҡулла­налар, етәкселек хужалары менән тотҡарлыҡһыҙ иҫәпләшә, һәр береһенә бишәр центнер мал аҙығы бирелә икән. Бесән-һала­мына ла ҡытлыҡ кисермәйҙәр пайсылар.
45 йылға яҡын ғүмерен ауыл хужалығына арнаған Риф Байбурин ауыл эшсәндәренең хеҙмә­тенән ҡәнәғәт, уларҙың һәр бере­һен маҡтап телгә ала. Йәмғиәт етәкселеге алдынғы һауынсылар Зинаида Бикбулатова, Рафиҡа Юнысова, Филзирә Хәлилова, механизаторҙар Әлфәт Ниғмәтуллин, Финат Бикбулатов, Рәзит Насиров менән Венер Халиҡовтың эшен билдәләне.