Республика Башлығы Рөстәм Хәмитов Силәбе өлкәһенә эш сәфәре барышында ҡайһы бер сәнәғәт һәм инфраструктура объекттарында булды.
Силәбелә ул өлкә губернаторы Борис Дубровский менән “Станкомаш” индустриаль паркын ҡарап сыҡты. “СП Конар-Чимолаи” яуаплылығы сиклән­гән йәмғиәтенең берлектәге Рәсәй-Италия предприятиеһы биналар һәм ҡоролмалар өсөн күләмле һәм ҡатмарлы металл конструкциялар сығара. Тағы ла бер предприятие – “Конар” акционерҙар йәмғиәте нефть һәм газ тармағы өсөн детал­дәр, узелдар етештерә.
Рөстәм Зәки улы етештереү участкаларында продукция сығарыу техноло­гияһы, ҡора­малдар ассортименты менән танышты, персоналдың эш шарттарын баһаланы. Ул шулай уҡ “Рус электр двигател­дәре” акционерҙар йәмғиә­те­нең нефть сәнәғәте өсөн электр двигателдәре етештергән за­вод­тың төҙөлөш майҙансығын ҡарап сыҡты. Предприятие былтыр апрелдә төҙөлә баш­лаған. Уны 2018 йылда сафҡа индереү күҙаллана.
Силәбе өлкәһенә сәфәр барышында Башҡортостан Баш­лығы Кременкүл ҡа­са­ба­һын­дағы “Рифей” ат спорты комплек­сында булды. Ул 2009 йылда асыл­ған һәм 47 гектар майҙанды үҙ эсенә ала.
Рөстәм Хәмитов ат аҙбарын ҡараны, үҙәк хеҙмәткәрҙәре һәм тренерҙар менән аралашты. Улар әйтеүенсә, бындағы спортсылар төрлө ярыштарҙа, шул иҫәптән Өфөләге “Аҡ­бу­ҙат” ипподромында үткәрелгән сараларҙа йыш ҡатнаша. Рөс­тәм Зәки улы бында башҡорт аттарының етмәүенә иғтибар итте һәм ошо мәсьәләне хәл итеүҙә ярҙам күрһәтергә вәғәҙә бирҙе.