Башҡортостан Президенты Рөстәм Хәмитов Рәсәйҙең төбәк үҫеше министры урынбаҫары Илья Пономарев менән эшлекле осрашыу үткәрҙе. Улар төҙөлөш тармағының үҫеше, халыҡты социаль торлаҡ менән тәьмин итеү мәсьәләләре тураһында фекер алышты.
Республика башлығы белдереүенсә, беҙҙә төҙөлөш тармағы, дөйөм алғанда, йылдам үҫешә. Мәҫәлән, былтырғы күрһәткестәр 2010 йыл менән сағыштырғанда һиҙелерлек яҡшырған. Быйыл да ошо йүнәлештә эш әүҙемләшәсәк.
Хәл ителеүҙе көткән мәсьәләләр араһында алданған өлөшсөләргә ҡағылышлыһы бигерәк тә мөһим. Республикала зыян күргән ошондай 1600 кеше бар, бюджеттан уларға ярҙамға миллиард һумдан ашыу аҡса бүленгән. Төҙөлөп бөтмәгән күп ҡатлы 12 йорт булһа, шуның унауһы Өфөлә икән. Һигеҙ йорт тапшырылыу алдында, икәүһе буйынса ҡатмарлыҡтар етерлек. "Әммә бер нимәгә ҡарамай был эште дауам итәсәкбеҙ", – тине Президент. Уныңса, енәйәтселәрҙе фашлау һүлпән бара, бихисап зыян күреүселәрҙән (ә улар меңдәрсә) һорау алыу оҙайлы ваҡыт талап итеүенә һылтанмалар күп. Тегеләр үҙ сиратында һаман да шул уҡ эшмәкәрлек менән шөғөлләнеүен дауам итә.
***
Торлаҡ төҙөлөшө – Башҡортостан һәм дөйөм ил өсөн иң көнүҙәк мәсьәләләрҙең береһе. Әлегә, үкенескә ҡаршы, ул тейешле күләмдә алып барылмай. Шуға ла халыҡты арзан торлаҡ менән тәьмин итеү – алдағы йылдарға ил етәкселегенең төп маҡсаттарының береһе. Рәсәй Федерацияһының Төбәк үҫеше министрлығының Өфөлә үткән күсмә ултырышында ла ошо турала һүҙ барҙы.
Форумда Рәсәйҙең төбәк үҫеше министры урынбаҫары Илья Пономарев, Башҡортостан Хөкүмәте Премьер-министры урынбаҫары Сергей Афонин ҡатнашты. Бында ла шулай уҡ алданған өлөшсөләр, Бөйөк Ватан һуғышы ветерандарын, хәрби хеҙмәттән отставкаға сыҡҡандарҙы торлаҡ менән тәьмин итеү тураһында ла фекер алышыу булды. Күп балалы ғаиләләргә ер биләмәләре бүлеп биреү мәсьәләһе лә ҡаралды.
2012 йылда республика халҡын торлаҡ менән тәьмин итеү кимәле йән башына 22,5 квадрат метр тирәһе тәшкил итергә тейеш. Был маҡсатҡа өлгәшеү өсөн быйыл 2310 мең квадрат метр күләмендә торлаҡ төҙөү күҙ уңында тотола.
– Был беҙҙең төҙөлөш комплексы өсөн үтә лә ҙур маҡсат, уға өлгәшеү башҡарма власть органдарынан һәм төҙөүселәрҙән бер-береһе менән килешеп эшләүҙе талап итәсәк, – тине Башҡортостандың Төҙөлөш һәм архитектура буйынса дәүләт комитеты рәйесе Хәлит Мәхмүдов. Уның фекеренсә, ҡуйылған маҡсаттарға өлгәшеүҙә ҡатмарлыҡ тыуҙырыусы һәм үҫеш темптарына аяҡ салыусы мәсьәләләр бихисап. Төҙөлөшкә рөхсәт алыу, йортто коммуникацияларға тоташтырыу, уны ҡулланыуға тапшырыуҙағы бихисап административ "кәртәләр" аша үтеү ҙур көс талап итә. Мәҫәлән, урын һайлау һәм төҙөлөш өсөн рөхсәт алыуға иң яҡшы осраҡта йыл ярым – ике йыл ваҡыт кәрәк.