Мал ҡарау тигәс, күҙ алдына тәү сиратта бесән һалыу, һыу эсереү килеп баҫа, аҙаҡ күнәккә гөбөрҙәтеп һауылған һөт, тәмле ит. Әммә бөгөн ит менән һөттөң үҙ ҡиммәтен аҙайтыу, етештереү продукцияһының сифатын яҡшыртыу маҡсатында ниндәй генә алым ҡулланмайҙар. Һәнәк тотоу ҡайһы бер ауыл хужалығы предприятиеларында инде “таш быуат” тип нарыҡлана.
Һүҙ ҙә юҡ, был йәһәттән Совет осоронда ҙур алға китеш булды, һуңғы йылдарҙа ла яңы технологияларға таянып, мал үрсетеүҙә йәнә еңеүҙәр күренә. Шулай ҙа сит илдән өйрәнәһе алымдар бихисап әле. Был хәҡиҡәтте Стәрлетамаҡ тар­маҡ-ара колледжында, мәҫә­лән, яҡшы аңлайҙар. Студенттар Германияға барып тәжрибә туплай.
Әлбиттә, теләк кенә етмәй, тик хыялдар тормошҡа ашһын өсөн шарттар булдырыу фарыз. Был йәһәттән колледж етәксе­легенең булдыҡлылығын бил­дәләргә кәрәк. Ҡайһы бер белем усаҡтары, әйткәс әйтә­йек инде, йүнләп уҡыу процесын да ойоштора алмаған мәлдә әлеге учреждение студенттарын, мәҫә­лән, сит илгә тәжрибә тупларға ебәрә, бер нисә һөнәргә уҡытыу мөм­кинлеген аса.
– Ауыл хужалығы белгес­тәрен әҙерләүҙә ҡоро теорияға таяныу – хаталы аҙым, мо­торҙы ҡутарып ҡарамай, малды дауаламай тороп, автомеханик та, ветеринар ҙа үҫтереп булмай. Был йәһәттән сту­дент­та­рыбыҙҙың Германияла һигеҙ ай буйы тәжрибә туплап ҡай­тыуы бигерәк тә отошло. Улар фермер ғаиләләрендә йәшәй, иген культуралары, йәшелсә, емеш-еләк үҫтереү, мал ҡарау буйынса тәжрибә нығыта. Быйыл яҙ һигеҙ сту­дентыбыҙ йәнә әлегеләй оҙайлы сәфәргә сығырға тора, – тине белгестәр әҙерләүҙең үҙенсәлекле алымы хаҡында колледж директоры Роберт Кәримов.
Әлбиттә, яуаплы сәйәхәткә теләгән һәр кем бара алмай – Германияға юлланыр өсөн башта үҙеңде Рәсәйҙә күрһәтеү фарыз.
– Тырышып уҡыуым, төрлө сараларҙа әүҙем ҡатнашыуым, немец телен махсус өйрәнеүем иҫәпкә алынды, – ти ветеринария йүнәлешендә 4-се курс студенты Динара Ҡорбанова. – Туплаған тәжрибә хеҙмәт юлымда, һис шикһеҙ, ярҙам буласаҡ, сөнки унда (Германияла) эш алымына, дауалау төрҙәренә бөтөнләй икенселәй – төплө ҡараш, минеңсә, – тип тәьҫо­раттары менән дә уртаҡлашты тырыш ҡыҙ.
Шәхсән үҙе айырманы күргән кеше менән бәхәс ҡороп булмайҙыр, ысынлап та, тех­нологияларҙы яңыртыу ғына түгел, тәү сиратта эше­беҙгә ҡарата баштағы мөнәсәбәтте яҡшыртырға кәрәктер. Юҡһа, йортонда ҡоҙоҡ ҡаҙырға йыбанып, һыйырҙарын мәкегә һыу эсерергә йөрөткән кеше­ләр ҙә юҡ түгел. Хәйер, миҫалдар етерлек инде ул…