20 ғинуарҙа Өфөлә Башҡортостан Республикаһының 2030 йылға тиклем үҫеш стратегияһының (“Стратегия-2030”) өҫтөнлөклө йүнәлештәре тикшерелде. Быйыл ҡабул ителәсәк документ проекты буйынса республика Хөкүмәте ағзалары, Башҡортостан Республикаһы Дәүләт Йыйылышы – Ҡоролтай депутаттары, муниципалитеттар башлыҡтары, банк-финанс өлкәһе вәкилдәре, фәнни ойошмалар, юғары уҡыу йорттары етәкселәре үҙ фекерен әйтте.
Башҡортостан Республикаһы Башлығы Рөстәм Хәмитов “Стратегия-2030” документын әҙерлә­гәндә иң юғары маҡсаттар ҡу­йыр­ға, әммә реалист булырға саҡырҙы:
– 2030 йылға тиклем үҫеш стра­те­гияһы – беҙҙең өсөн үҙмаҡ­сат түгел, ә үҫештең дөрөҫ йүнә­лештәрен билдә­ләү өсөн кәрәкле мөһим эш ҡоралы. Стратегияны әҙерләгәндә республика­лағы бөгөнгө хәлдәрҙе бер яҡлы ғына баһаларға ярамай, иң эре сәнәғәт предприятиеларының потенциалын баһалап еткермәү ҙә дөрөҫ түгел.
Башҡортостан Республикаһы – Рәсәй Федерацияһының иң эре, терәк төбәктәренең береһе. Стратегияны әҙерләгәндә, һис шикһеҙ, идеалистик ҡараш­тарҙан арынырға, реалист бу­лырға тейешбеҙ. Нефть, нефть хи­мияһы һәм химия сәнә­ғәттәренең иҡтисадтағы өлөшө киләсәктә лә ҙур буласаҡ. Эре сәнәғәт тармаҡтары – беҙҙең иҡтисадтың нигеҙе – киләсәктә лә үҫешергә, алға хәрәкәт итергә тейеш.
Беҙгә ҙурыраҡ маҡсаттар ҡуйырға кәрәк. Мин ҡайһы бер осраҡтарҙа рес­пуб­ликаның Рәсәй Федерацияһы субъекттары араһында өсөнсө тиҫ­тәләге урындарға төшөүе ме­нән киле­шә алмайым. Маҡ­сат­тарҙы ундай тү­бән позиция­лар­ҙан сығып ҡуйырға ярамай. Беҙ­ҙең лайыҡлы урыныбыҙ – беренсе тиҫтәлә, унан да һәйбә­те­рәге – тәүге биш субъект араһын­да, ә бының өсөн беҙ иң алдынғы өс лидерҙы өлгө итеп алырға тейешбеҙ. Иҡтисад үҫеше, социаль структура йәки бизнес өлкәһендәге маҡсаттарҙы беҙ хәҙер иң юғары позицияларға ҡарап ҡына билдәләй алабыҙ…
Республика етәксеһе ҡыҫҡаса ғына белдергән фекерҙәр яҡын киләсәктә алдыбыҙға ниндәй етди, ауыр мәсьә­ләләр килеп ба­ҫа­сағына асыҡлыҡ индерә төштө. Һис шикһеҙ, нефть сә­нә­ғәте предприятиелары артабан да “нефть республикаһы” булараҡ танылыу яулаған Башҡортостан иҡтиса­ды­ның нигеҙен тәшкил итәсәк. Ләкин, ысынбарлыҡтан сығып ҡара­ғанда, беренсенән, нефть тармағын­дағы милек мөнәсәбәт­тәре өлкәһендә барған үҙгә­рештәрҙең әлегә республика файҙаһына булмауы хәлде ҡат­марлаштырғанды иҫәпкә алмау мөм­кин түгел. Артабанғы ышаныслы үҫеш өсөн милек нисбәтен Баш­ҡортостан файҙаһына үҙгәр­теү рес­публикалағы барлыҡ ре­сурс­тарҙы, стимулдарҙы, компе­тенцияларҙы, ниһайәт, нефтсе кадр­ҙарының ини­циативаһын, ижади энергияһын тулы­раҡ, уңыш­лыраҡ фай­ҙаланыуға киң юл асасағы бәхәс­һеҙ. Иртәме-һуңмы, Федераль үҙәктә лә был хәлде аңлаясаҡтары шикһеҙ. Икенсенән, нефть эшкәртеү өлкә­һен­дә конкурент­лыҡтың көсәйеүе Баш­ҡорт­ос­тандың был йүнәлештәге пози­цияларын ҡаҡ­шата төшәсәге аң­лашы­ла. Был шарттарҙа нефть тармағын­дағы милек мөнә­сәбәт­тәрен, мәҫәлән, Татарстан өлгө­һөндә камиллаштырыу, ошо нигеҙгә таянып, яҡын килә­сәктә респуб­ликалағы креатив сәнәғәт төр­ҙәрен тергеҙеү мөһим стратегик йү­нә­леш була ала. Баш­ҡорт­останда бы­ның өсөн, мәҫә­лән, элекке тулы ҡе­үә­тенә эшләй алмаған, әммә потен­циалдары бик юғары булған хәрби сә­нә­ғәт предприятиеларында һаҡ­ланған тейешле компетенциялар, кадр­ҙар ресурстары етерлек. Уларҙы файҙа­ла­нып, заманса кимәлдә ойоштороп, алдыбыҙҙа торған стратегик үҫеш мәсьәләләрен иң тәүҙә республика мәнфәғәтендә хәл итеүгә йүнәл­дереү маҡсатҡа ярашлы буласаҡ.