Рәсәй 2016 йылда ҡара күмер сығарыу күләмен һиҙелерлек арттырҙы. Энергетика министрлығы мәғлүмәттәренә ҡарағанда, йыл ахырына шахтерҙар 390 миллион тонна антрацит биреп, уның 165 миллион тоннаһы экспортҡа оҙатыласаҡ.


Антрацит – таш күмерҙең борондан сығарыла килгән иң сифатлы сорты. 2016 йылда ул хатта дәүләт планынан күпкә артығыраҡ етеш­терелгән. 2030 йылға тиклем ҡабул ителгән энергетик стратегияға ярашлы, быйыл 370 миллион тонна күмер сығарып, йәнә был һанды йыл һайын арттыра барып, алдағы 15 йылда 430 миллион тоннаға еткерергә тейеш инек.
Бындай ғәжәп уңыштың сәбәбе, беренсенән, илдә таш күмер запасы­ның күп булыуы. Рәсәй донъя­ла, АҠШ-тан ғына ҡалышып, икенсе урынды биләй. Өсөнсө баҫҡыста – Ҡытай. Был ҡаты яғыулыҡтың 200 миллиард тонна самаһы 500 йыл буйы сыға­рырға етәсәк. Әйткәндәй, Рәсәйҙең ҙурыраҡ күмер ятҡылыҡта­рындағы байлыҡ уларға хатта меңәр йыл буйы өҙлөкһөҙ эшләргә етәсәк.
Икенсенән, 15 - 20 йылдан донъя­ны йәнә күмер шауҡымы яулап алыр тип көтөлә. Антрацит, осһоҙ яғыулыҡ төрө булараҡ энергетика өлкәһендә әүҙем ҡулланылып, нефтте алмаш­тырасаҡ. Әгәр донъяла күмергә ихтыяж үҫә барһа, Рәсәй уны экспортҡа оҙатыуҙан йыл һайын 20 миллиард доллар самаһы аҡса эшләйәсәк, тип белдерә белгестәр.