Йыл аҙағында беҙҙе бик үк күңелле булмаған ваҡиға көтә: мөлкәт, ер һәм транспорт һалымдарын түләп ҡуяһы бар. Ләкин дәүләтебеҙ йәшәһен, нығыһын тиһәк, һалым түләү – изге бурыс. Мөлкәт алырға аҡсабыҙ булған икән, һалымына ғына табырбыҙ. Быйыл уны түләүҙә үҙгәрештәр ҙә булып алды.
Уларҙың шунда уҡ иғтибарҙы йәлеп иткәне – 2016 йылдан башлап һалымдарҙы түләүҙең 1 декабргә хәтлем оҙайтылыуы. Ошоға саҡлы һалымдарҙы 1 ноябргә тиклем түләү шарт ине. Рәсәй Президенты Владимир Путин ҡул ҡуйған “Рәсәй Федерацияһының Һалым кодексы­ның икенсе өлөшөнә үҙгәрештәр индереү тураһында”ғы Федераль закон былтыр 24 ноябрҙә үҙ көсөнә инде. Уға ярашлы, физик берә­мектәрҙең килеменә һалымдан азат ителгән тағы бер күрһәткес өҫтәлде: суд сығымдары өсөн түләнгән һәм ошо судтың ҡарары менән кире ҡайтарылған аҡсанан дәүләткә бер тин дә китмәй, ә бына банкта сит ил валютаһында булған тупланманан һалым мотлаҡ тотоп алып ҡалына. Һумдарҙағы аҡса тупланмаһы элеккесә ҡала – уларҙан һалым түләнмәй, фәҡәт процент ставкаһы артҡанда ғына был ҡағиҙә үҙгәрәсәк.
Һалым кодексының 32-се киҫәге мөлкәт һалымы түләгәндә быны тулыһынса кадастр хаҡына нигеҙ­ләнеп башҡарыуҙы күҙ уңында тота. Элегерәк иһә бының өсөн ошо бинаның инвентарь хаҡы нигеҙ итеп алына ине. Һалым һалынған мөлкәт тип был осраҡта йорт, торлаҡ май­ҙаны (фатир, бүлмә), гараж, тамам­ланмаған төҙөлөш объекты һәм башҡа биналар иҫәпләнә. Һалым күләмен билдәләгәндә йорттоң һатыу хаҡына, ҡайҙа урынлашыуына ҡарайҙар. Был өлкәләге ҡануниәт быйыл да социаль йүнәлешлелеген һаҡлай: ҙур хеҙмәт стажына эйә булған йәки дәүләт наградалары алған айырым төр граждандарға, шулай уҡ яҙмыш осрағы арҡаһында түләй алмаҫлыҡ хәлдә ҡалған кеше­ләргә мөлкәт һалымына ташлама бирелә. Ташламаны һәр кем үҙе һай­лаған бер объект өсөн генә фай­ҙаланырға хоҡуҡлы. Пенсионер­ҙар өсөн иһә үҙгәреш юҡ – улар мөлкәт өсөн һалым түләмәй. Ә бына ер өсөн һалымда өлкән быуын өсөн ташлама юҡ.