Конгресс-холдың фойеһында алма төшөрлөк тә урын юҡ. Бында Ауыл хужалығы һәм эшкәртеү сәнәғәте хеҙмәткәрҙәре көнөнә арналған тантаналы йыйылыш уҙа. Ауыл уңғандарының бай йөкмәткеле күргәҙмәһендә күгәрсен һөтө генә булмағандыр. “Башҡорт ҡаҙы”, “Башҡорт бройлеры”, “Ҡурай төбәге” предприятиелары, “Алексеевка” совхозы, “Рус игене” йәмғиәте, “Умартасылыҡ һәм апитерапия буйынса ғилми-тикшеренеү үҙәге” дәүләт учреждениеһы, шулай уҡ Мәләүез, Стәрлетамаҡ, Мәсетле, Бүздәк, Белорет, Дәүләкән, Дыуан райондары фермерҙары һәм башҡалар үҙҙәре етештергән ит һәм һөт ризыҡтарынан, икмәк-ҡаластан, бал һәм емеш-еләктән ауыҙ иттерҙе.
Башҡортостан Башлығы Рөс­тәм Хәмитов юҡҡа ғына тел­мәрен хеҙмәт батырҙарына рәхмәт һүҙҙәре менән башламаны, сөнки аграрийҙар 3,25 миллион тоннанан ашыу иген үҫте­реп бураларға һалған, шул уҡ ваҡытта йәшелсә-емеш һәм картуф та бик уңған.
– Һеҙҙең фиҙакәр хеҙмәте­геҙгә, һис шикһеҙ, юғары баһа бирергә кәрәк, ул иҡтисадтың нигеҙен тәшкил итә, – тине Рөстәм Зәки улы. – Бигерәк тә быйыл ҡаҙаныштар менән һөйөндөрҙөгөҙ. – “Алтын көҙ” Бөтә Рәсәй күргәҙмәһендә, үткән йылдарҙағы шикелле, республи­кабыҙҙың агросәнә­ғәт комплексы бик юғары баһа­лан­ды. Беҙҙең хужа­лыҡтар 309 ми­ҙал менән бүләкләнде, шу­ның күбеһе (186) – алтын! Яҙғы сәсеүҙе һәм ураҡты дөрөҫ ойоштороуға айырым туҡтал­ғы килә. Һуңғы йыл­дарҙа тәүге тап­ҡыр 1 сен­тябр­гә хәтлем ашлыҡтың 95 процентын йыйыуға өлгәштек.
Республика Башлығы иҡти­сад үҫешенә мул өлөш индергән Стәр­летамаҡ, Саҡ­мағош һәм Илеш ра­йондары эшсәндәрен маҡтап үтте. Шулай уҡ Баймаҡ, Хәйбулла һәм Әбйәлил райондары уңған­дары ла һынатмаған.
Рәсәй Ауыл хужалығы ми­нистрлығының Үҫем­лексе­лек, үҫемлекте механизациялау, химик эшкәртеү һәм һаҡлау департаменты директоры Петр Чекмарев, баш­ҡортос­тандарҙы Рәсәйҙең ауыл хужалығы министры Александр Ткачев исе­менән ҡот­лап, республиканың Волга буйы федераль округында ғына түгел, ә тотош Рәсәй буйынса иген, шәкәр сөгөл­дөрө, картуф һәм йәшелсә-емеш етеш­тереүҙә лидер икәненә ба­ҫым яһаны.
Аҙаҡтан иң-иңдәргә дәү­ләт наградалары тапшырылды. Ә меха­низа­торҙар араһында ойош­торолған конкурс еңеүсе­ләре иһә еңел автомобиль асҡыстары алып ҡыуанды.