Ҡомъяҙы ауылында йәшәгән Зинфира Нурисламова былтыр, республика программаһына ярашлы субсидия алып, эш башлағайны. Унан һуң йылға яҡын ваҡыт үтте.

Ошо арала йылытылған ҡош-ҡорт аҙбары төҙөнөләр. Май, июнь айҙарында себештәр ҙә сыҡты. Йәнә Стәрлетамаҡ ҡош­солоҡ фабрикаһынан тоҡомло 300 баш күркә себеше алып ҡайттылар. Бынан тыш, Нурисламовтар хужалығында голошейка тоҡомло тауыҡтар ҙа үрсетелә. Шулай уҡ 100 баш бройлер тауыҡтары ла бар.
– Күркәне үҫтереү бик тә мәшәҡәтле. Инкубаторҙан яңы сыҡҡан себештәр алып ҡайтҡай­ныҡ. Башта уларҙы ғаиләбеҙ менән тәүлек әйләнәһенә яндарынан китмәй тәрбиәләнек. Мәгәр һөҙөмтәһе табышлы булыр тип уйлайым, – ти Зинфира Нурисламова, эше барышында­ғы беренсе уңыштары менән уртаҡлашып.
Сауҙа нөктәләрендә бөгөн күркә итенең килограмы 350 һум тора. Ә ата күркәнең тереләй ауырлығы 30 килограмға тиклем етергә мөмкин. Голошейка то­ҡомло тауыҡтар ҙа 6,5 килограмм самаһы тарта.
– Уларҙы тәжрибә сифатында үҫтереп ҡарау өсөн бер нисә баш һатып алғайныҡ. Отошло булһа, хужалығы­быҙҙа һанын арттырырға иҫәп тотабыҙ. Ә күркәләрҙе 500 башҡа еткереү ниәте менән эшләйбеҙ, — ти Зинфира ханым, алдағы пландары менән таныштырып.
Ноябрҙә ҡоштарҙы һата башларға, бөтәһе 800 мең һум самаһы табыш алырға ниәтләй уңғандар.