Ҡырымға автосәйәхәт » Башҡортостан гәзите | Газета Башкортостан на башкирском языке. Архив материалов.

Башҡортостан гәзите » Иҡтисад » Ҡырымға автосәйәхәт

Ҡырымға автосәйәхәт 15.07.2016 // Иҡтисад / Әҙәбиәт

Ошо көндәрҙә Башҡортос тандың баш ҡалаһы Өфөнән еңел машиналарҙа тиҫтәләгән ҡыҙ-егет Ҡырымға ҡарай юл алды. “Барыһы ла мөмкин!” тигән девиз аҫтында улар ун көндә 5000 саҡрым юл үтергә ниәтләй.

Автосәйәхәттә ҡырҡлап кеше ҡатнаша. Волгоград, Керчь, Севастополь, Белогорск кеүек герой-ҡалалар аша уҙып, яугир ата-бабаларыбыҙҙың иҫтәлегенә сәскә һалыуҙы ла маҡсат итеп алған улар. Сарала башҡорт этно-рок төркөмө “Арғымаҡ” һәм Рәсәй йондоҙҙары менән бергә регги, хип-хоп, фанк һәм рок элементтарын үҙ эсенә алған “Виа Чаппа” (Via Chappa) төркөмө ҡатнашыуы айырыуса ҡыуандыра. Ҡырым халҡына башҡорт мәҙәниәтен танытыу маҡсатында әлеге ҡалаларҙа бай концерт программаһын тәҡдим итәсәк улар.
Йәйге ялын фәһемле үткәрергә ниәтләгән милләттәштәребеҙ шулай уҡ авиашоуҙа һәм яу үткән юлдарҙа спелеологик-археологик экспедицияларҙа ҡатнашып, сәйәхәтен Судак ҡалаһының диңгеҙ ярында тамамлаясаҡ.
Ә әлегә беҙҙең менән бәйләнештә – автосәйәхәтселәрҙең үҙҙәре.
“Арғымаҡ” төркөмө солисы Ринат Рамаҙанов:
– Сәләм, Башҡортостан! Әле беҙ Волгоградта. Кисә ҡаланың үҙәк майҙанында башҡорт рухын, мәҙәниәтен, асылын сағылдырған концерт булды.
Йөрөгән һәр еребеҙҙә яңы танышлыҡ булдырып, тарихыбыҙ, йолаларыбыҙ хаҡында һөйләп йөрөйбөҙ. Беҙҙе бик ихлас ҡабул иттеләр, бик шатбыҙ!
Айгиз Ханов:
– Өфөнән 11 июлдә ҡуҙғалдыҡ, беҙҙе матур итеп оҙатып ҡалдылар. Был автосәйәхәттең маҡсаты – ғаилә һәм дуҫлыҡ ҡиммәттәрен тулы матурлығында пропагандалау, яугир ата-бабаларыбыҙ үткән юлдарҙан уҙып, уларҙы иҫкә алыу, үҙебеҙҙең милләттең йөҙө, мәҙәниәте менән таныштырыу.
Кисәге көнөбөҙ тәрән кисерештәргә бай булды, концертты һәр башҡортҡа доға бәрәбәрендәге “Урал” халыҡ йыры менән башланыҡ. Илап тыңланы тамашасылар. Тимәк, үҙ маҡсатыбыҙға өлгәштек. Үткәненә ихтирамлы милләт кенә милләт булырға лайыҡлы!

Автор: Таңсулпан РӘСҮЛ.

Баҫып сығарырға