Зәлифә һәм Рәмил Билаловтар боронғо кәсепте заманса­лаштырған. Был йәш ғаилә менән танышмаҫ элек үк уларҙың биҙәп эшләнгән, айырыуса зауыҡлы йыуыныу ҡоролмаһын күреп һоҡланғайным. Була бит ғәжәп кешеләр! Береһе – ағас оҫтаһы, икенсеһе – рәссам! Бер-береһен тулыландырып торған йәштәр ҡул ҡаушырып ултырырға яратмай – үҙ эштәрен асып ебәргән. Рәмил Ғәлиәхмәт ауылы егете булһа, Зәлифә – Учалы районы ҡыҙы. Егет Сибай политехник колледжын тамамлап, әрмелә хеҙмәт иткәндән һуң, милицияла ике йыл эшләп алған. Шунан һуң инде эшҡы­уарлыҡҡа тотонорға тәүәккәлләгән дә инде.

– Колледжда уҡығанда таштар менән ҡыҙыҡһындым. Беҙгә заказ биреп, уларҙан төрлө әйбер яһата торғай­ны­лар. Уҡып та, оҫтаханала эшләп тә йөрөнөм. Ауылға ҡайтҡас, таш беҙҙең ерлек өсөн бигерәк ауыр һәм ҡый­бат шөғөл булыр тип, ағасҡа тотондом. Район хаки­миә­тенән маҡсатлы программа буйынса 300 мең һум аҡса­лата ярҙам алып, кәрәкле ҡорамалдар хәстәрләнем. Кәләшем менән бер уҡыу йортонда белем алғас, ҡараш­та­рыбыҙ, һайлаған һөнәр­ҙә­ребеҙ ҙә бер иш тиерлек. Ул Аҡъяр тау колледжы китап­ха­наһында эшләп декретҡа сыҡты. Әле миңә ярҙам итә – һүрәт төшөрә. Ағастың кип­кәнен алам, ул ышаныслыраҡ була, – ти уңған хужа.
“Аҡъегет” яуаплылығы сикләнгән йәмғиәте оҫталары бына дүрт йыл инде заказ буйынса һандыҡтар, карауаттар, балалар өсөн өҫтәл, ултыр­ғыс, шкафтар, йыуыныу урыны, аш бүлмәһе өсөн кә­рәк-яраҡ, бал тәпәне, уйын­сыҡтар, эт оялары, гөл өсөн аҫлыҡтар, сәңгелдәктәр һәм башҡа күп төрлө әйберҙәрҙе яһап, һатыуға сығара. Ғәлиәх­мәт ауылына балалар май­ҙансығы эшләп ҡуйғандар. Зәлифә иренә бар яҡлап ярҙам итергә тырыша, уның йыһаздарына күҙ яуын алырлыҡ сәскәләр, күбәләк­тәр, хатта малайҙар өсөн машиналар, йәнһүрәт герой­ҙарын төшөрә. Билаловтар эшләгән әйберҙәрҙәге бындай сағыу, үҙенсәлекле биҙәктәр һәр кемдең иғтибарын йәлеп итә.
Йәш ғаилә Яҙгөл һәм Ил­һам исемле балалар үҫтерә. Яңыраҡ ҡына район үҙәгендә йорт һалып сыҡҡандар.
Билаловтар әйтеүенсә, һандыҡ өсөн кәмендә бер аҙна ваҡыт кәрәк. Кипте­рел­гән әҙер ҡарағай таҡталарҙан станок ярҙамында һандыҡты эшләгәс, уны йышып шымарталар. Зәлифә тәүҙә һүрәт төшөрөп, буяуҙар менән биҙәп сыға. Һүрәт кипкәс, йәнә бер нисә ҡат буярға кәрәк.
– Хәҙер йортта һандыҡҡа бигүк урын табылып етмәй ке­үек, шуға күрә беҙ был йы­һазды заманға яраҡ­лаштырып, журнал өҫтәле рәүешендә эшләйбеҙ. Уны диван янына ҡуйырға ла була, – ти Рәмил.