Тәүҙә Өфөнән, һуңынан Мәскәүҙән рөхсәт алғас, ҡапҡа асылды. Эскә үтәбеҙ. Иҫ китмәле бындай күренеште фантастик киноларҙан ғына ҡарарға мөмкиндер: рәт-рәт теҙелгән “плитәләр” ҡояш нурын “йота”, араларында вагонға оҡшаған будкалар ғына тора. Улары иһә ошо нурҙарҙан хасил булған энергияны эшкәртеп, яҡындағы “Бөгөлсән” станцияһына ебәрәсәк. Әлегә бында һуңғы көйләү эштәре бара.
– Бөгөлсән ҡояш станция­һы­ның ҡеүәте биш мегаватт тәш­кил итәсәк. Был инде меңгә яҡын хужалыҡты тәьмин итергә тейеш, – ти капиталь төҙөлөш бүлеге инженеры Руслан Сейт. – Ҡоролманы төҙөү өсөн һигеҙ меңгә яҡын ҡаҙыҡ, 20 мең электр модуле, шуға ярашлы юғары вольтлы станция ҡора­малдары китте. Ул район, рес­пуб­лика энергетика систе­ма­һына эшләйәсәк. Беҙ электр энергияһын алты кило­вольтҡа тиклем еткереп, ярҙамсы станцияға бирәсәкбеҙ. Ул инде ҡулланыусыларға бү­ләсәк…
Ҡояш электр станцияһы һы­маҡ объекттар киләсәктә донъя иҡтисадында мөһим урын алып торасаҡ. Һуңғы ете-һигеҙ йыл эсен­дә ошо йүнәлешкә иғтибар ныҡ артҡан. Рәсәйҙә лә уларҙы төҙөүгә өҫтөнлөк бирелә башланы. Бының өсөн алдан көнь­яҡ төбәктәр, райондар бил­дә­­ләнә. Төҙөлөштәр Рәсәй Федерация­һын­да яңы энергия сығанағы үҫе­шенә этәргес би­рә­сәк. Әйтергә кәрәк, йылдан-йыл ҙу­рыраҡ тәжрибә туплана. Тәү ҡа­ра­маҡҡа финанс йәһә­те­нән сы­ғымдар күп һымаҡ булһа ла, киләсәктә ҡояш электр станциялары үҙен аҡлаясаҡ.
– Рәсәй эксперттары ил­дә ошондай станциялар үҫеш ала­саҡ, тип билдәләй. Улар энер­гетика баҙарында үҙ урынын та­ба­саҡ, – ти Руслан Сейт.
Ысынлап та, булғанына шө­көр итеп ятыр заманалар үтте. Бар донъя эҙләнә, таба, көн­кү­ре­шенә индерә. Бөгөн энергия сығанаҡтарына ҡытлыҡ юҡ ке­үек булһа ла, ил иҡтиса­ды­ның үҫеше туранан-тура ошо өлкәгә бәйле. Быйыл Өфөлә энерге­тик­тарҙың Халыҡ-ара форумы үт­кәйне. Унда ла төрлө илдәр­ҙән килгән ғалимдар биологик һәм ҡояш энергети­каһы­ның ки­лә­сәктә үҙ урынын ныҡлы таба­сағына, көслө тармаҡҡа әйлә­нә­сәгенә баҫым яһаны.