Халыҡ тормошо сәйәсәт, иҡтисад тормошона бәйле. Рәсәй Фәндәр академияһының Өфө ғилми үҙәге Тарих, тел һәм әҙәбиәт институтында уҙған фәнни конференция йәмғиәтте борсоған байтаҡ һорауҙарға яуап эҙләү маҡсатынан ойошторолғайны.


“Фашизмды тар-мар итеүҙә Баш­ҡортостан Республикаһының роле: тарихи тәжрибә һәм милли хәүефһеҙлек өлкәһендә заман проб­лемалары” тигән темаға ҡоролған һөй­ләшеүҙә инс­титут директоры, филология фән­дәре докторы Фирҙәүес Хисамитдинова, Дәүләт Йыйылышы – Ҡоролтай Рәйесе урын­баҫары Йомабикә Ильясова, Өфө ҡала хакимиәте башлығы урынбаҫары Сынтимер Баязитов сы­ғыш яһаны.
Бөйөк Ватан һуғышы йылдары һәр ғәзиз йөрәктән күпме зар, рух ныҡ­лы­ғы талап итеүе, Еңеүҙең ниндәй көс менән яулап алыныуы бер кемгә лә сер түгел. Йомабикә Сәләхетдин ҡыҙы ошо хәҡиҡәтте күҙ уңында тотоп:
– Бөгөн Көнбайыш тыныслыҡты үҙен­сә аңлау концепцияһын көсләп тағырға маташа. Ләкин ғәҙелерәк юл бар бит, ул – һәр халыҡтың, илдең милли һәм мәҙәни үҙенсәлеккә хоҡу­ғы, уның нигеҙендә тарихи күсәги­леш­лелек принциптары ята. Ҡыҙ­ғанысҡа ҡаршы, Икенсе Бөтә донъя һуғышы һөҙөм­тәләренә башҡаса күҙлектән ҡараған сәйәсмәндәр Еңеү­ҙең баһа­һын төшөрмәксе. Әм­мә беҙ уның ниндәй ҡорбандар менән яуланғанын беләбеҙ, – тип белдерҙе.
– Илебеҙҙә һуғыш афәтен күрмәгән бер генә ғаилә лә юҡтыр. 27 миллион ҡорбан биреп яуланған Бөйөк Еңеүҙең тарихи әһәмиәте баһалап бөткөһөҙ, – тип өҫтәне Өфө ғилми үҙәге Президиумы рәйесе, Рәсәй Фәндәр акаде­мия­һының мөхбир ағзаһы Усейн Джемилов.
Секцияларҙа эш башланғас, Бөйөк Ватан һуғышы тарихын өйрәнеүҙең заманса алымдары, республиканың Еңеүгә индергән өлөшөнә арналған сығыштар яңғыраны, төрлө мәсьәлә­ләр тикшерелде.