Ауыл халҡының көнитмеше элек-электән малға бәйле. Шуға ла ихаталағы был йән эйәләренең иҫән-һау булыуы — һәр крәҫтиәндең изге теләге. Ни тиһәң дә, ауыр һуғыш осоронда ла уның ярҙамында күптәр аслыҡтан бөгөлмәгән. Хоҙай аҡтан айырмаһын тигән әйтем дә ана шул замандан килә. Ә инде малдың сәләмәтлеген хәстәрләгән ветеринария хеҙмәткәрҙәре эшенең әһәмиәте һис ҡасан кәмемәй.

Асҡын еренә юл төшкәс, ветеринария станцияһы хеҙмәткәрҙәре менән яҡындан күрешеп, эш барышын ҡарап сыҡтыҡ. Бөгөн районда 15 меңгә яҡын һыйыр малы иҫәп­ләнгәндә, был тармаҡ белгестәренең хеҙмәте ни тиклем мөһим икәнлеген әйтеп тораһы түгел.
– Хәҙер ауыл хужалығы продукцияһын кү­берәк етештереүҙе илебеҙ етәкселеге төп маҡ­саттарҙың береһе итеп ҡуя, – тип һүҙен баш­ланы ветеринария станцияһы на­чаль­нигы Руслан Ғәл­лә­мов. – Ә бит ризыҡ сифат­лы бул­һын өсөн мал­дың һау­лығын хәстәрләргә кә­рәк. Ауырыу һыйырҙан йә аттан ни файҙа? Шуға ла мал табиптары урындағы халыҡ өсөн терәк булып тора.
Мал-тыуарҙың сәләмәт­леген генә түгел, халыҡтың һаулығын да ҡайғырта улар. Мәҫәлән, баҙарҙа һатылған ит, һөт ризыҡтарының сифа­тын кем тикшерә? Әл­бит­тә, ветеринария хеҙ­мәт­кәрҙәре. Ҡағиҙәгә ярашлы, һәр хужа ризыҡты баҙарға сығарғанда уларҙың рөх­сә­тен алырға тейеш. Хәйер, Асҡын районында был йә­һәт­тән ике лаборатория уңышлы эшләй. Ит һәм һөт ризыҡтары бында санитар экспертиза үтмә­йенсә, ба­ҙарға эләкмәй.
– Яҙ – беҙҙең өсөн иң ҡыҙыу миҙгел, – ти мал табибы Рәшиҙә Зиннурова. – Күпселек сирҙәр шул ваҡытта көсәйә. Шуға ла хужа­лыҡ­тарҙағы һәр малға прививка эшләйбеҙ, халыҡ араһында аңлатыу эше алып барабыҙ.
Һәр коллективтың уңышын намыҫлы хеҙмәткәрҙәр бил­дәләй. Был йәһәттән лабо­ра­то­рия мөдире Кифая Ну­р­мө­хәмәтова кеүек үҙ эше­нең оҫтаһы – күптәргә үрнәк. Ул утыҙ йылдан ашыу һайлаған һөнәренә тоғро ҡалып килә.
Ветеринария хеҙмәтенә йәштәр ҙә ҡыҙыҡһыныуын юғалтмай. Яңы ғына ҡулына диплом алған Владик Хә­ки­мов менән Фаил Юнысов – ана шул булдыҡлы егеттәр иҫәбенән.
Руслан Ғәлләмов әйте­үен­­сә, һуңғы йылдарҙа төбәктә мал һаны арта. Тимәк, ауыл хужалығының төп таяныс­та­рының береһе булған тармаҡ хеҙмәткәрҙәренә эш етәрлек.