Тәртиптең тупһанан башланыуы бәхәсһеҙ. Халыҡ юҡҡа ғына “Хужаһы ниндәй, йорто ла шундай” тимәй бит. Республи­кабыҙҙың төньяҡ-көнбайы­шына сәфәрҙә саҡта ирек­һеҙ­ҙән ошолар иҫкә төштө. Был юҡҡа түгел, сөнки Яңауыл ҡалаһына миҙгелдең ҡайһы ваҡытында килмә, ундағы йәшеллек һәм таҙалыҡ һәр кемдә һоҡланыу уята. Халыҡ эргә-тирәгә һаҡсыл ҡараштамы, әллә бүтән сәбәп бармы? Ошо һәм башҡа һорауҙарға яуап алыр өсөн “Юл-йәшелләндереү эштәре” муниципаль унитар предприя­тиеһы директоры, Баш­ҡортос­тан­дың атҡаҙанған ауыл хужалығы хеҙмәткәре Рафаил ЯХИН менән әңгәмә ҡорҙоҡ.
– Ҡалаға килгәндәр бындай хозурлыҡҡа хайран ҡала. Айырыу­са йәй иҫ китмәле – төрлө ағастар, күҙ­ҙең яуын алырҙай булып балҡыған сәскәләр... Матурлыҡтың сере ни­мәлә?
– Яңауылды гөл баҡсаһына әйлән­де­реү өсөн йыл әйләнәһенә тыры­шабыҙ. Ә инде йәй миҙгеле тураһында һүҙ алып барғанда, мөһим ике әйбергә туҡталмаҡсымын. Беренсенән, бул­ған­ды ҡәҙерләп һаҡлау һәм тәртиптә тотоуға күп көс түгелә. Тротуар уңай­лы итеп һалынған, түтәлдәр үҙ урынында икән, ниңә уны емерергә йәки ҡайтанан төҙөргә? Киреһенсә, уға йән өрөргә кәрәк, әллә ҡайҙан балҡып торһон! Икенсенән, яңыртыуға иғти­бар бүләбеҙ. Мәҫәлән, парктарға ха­лыҡ теләп, ашҡынып килһен өсөн тыры­шабыҙ. Уларҙың барыһында ла кешеләрҙең күп йөрөүен күреп күңел ҡыуана. Тимәк, атҡарған ғәмәлдә­ребеҙ юҡҡа түгел.
– Бындай мөғжизәне кемдәр тыу­ҙыра?
– Беҙҙең “Юл-йәшелләндереү эш­тә­ре” предприятиеһы районда иң алдынғыларҙан һанала. Яңауылдар һәм күршеләр генә түгел, бүтәндәр ҙә быны таный, беҙҙең коллективты татыу һәм дуҫ булараҡ та белә. Үҙҙәре ошонда йәшәгәс, һәр кем тыуған ҡалаһын хозур итеп күрергә тырыша, күрһәтергә ынтыла. Предприятиелағы алты тиҫтәнән ашыу кешенең һәр береһе – үҙ эшенең оҫтаһы. Мәҫәлән, гүзәл заттарҙан Фәниә Ғәләүева, Ләйсән Аҡмуллина, Рәмилә Йөҙйәшә­рова, Татьяна Букина, Йәзилә Вәлие­ва, шулай уҡ Таһир Ғәлин, Индәф Хәй­ретдинов, Шәйҡинур Шәйхет­динов, Раил Мусин кеүек намыҫлы ир-егеттәр барҙа төйәгебеҙ киләсәктә лә таҙалыҡтан көҙгөләй ялтырап торор.
– Ҡала йылдан-йыл үҫә. Моға­йын да, эш күләме лә арталыр...
– Ул Яңауыл һәм Буй йылғалары буйында төҙөлгән. Бында 163 тирәһе урам бар. Әйткәндәй, юлдарҙы ремонтлау, асфальт түшәү, күперҙәрҙе төҙөкләндереү, зыяратты кәртәләү планға ярашлы бара. Ғөмүмән, яңы ауыл нисек итеп балҡыһа, Яңауылы­быҙ ҙа шулай күркәм, бөхтә. “Рәсәйҙең иң төҙөк ҡалаһы” тигән мәртәбәле конкурста ҡатнашып, еңеү яулауыбыҙ – уңышлы эшкә дәлил. Район хаки­миә­тенең ҙур хәстәрен һәм ярҙамын тойоу айырыуса дәртләндерә.