– Тегендә – Гөмбә, бая әйткән ауыл инде, – тине ул, дала яғына төртөп күрһәтеп. – Күрше хаҡы – тәңре хаҡы тигәндәй, бер-беребеҙгә ярҙам итәбеҙ, хатта нисектер үҙ-ара ярышыу, шәберәк икәнлегеңде иҫбатларға маташыу тойғоһо ла юҡ түгел. Ырымбурҙар һуҙылырға, һәл­кәүләнергә ирек бирмәй. Күршеләр гектарынан утыҙ центнер ашлыҡ һуғып алһа, беҙҙә уңыш унан да юға­рыраҡ булһын тип тыры­шабыҙ.
Хужалыҡ идараһы Яҡ­шем­­бәттә урынлашҡан. Уның ҡарамағында тиҫтәнән ашыу ауыл иҫәпләнә, 500 тирәһе кешенең бында үҙенә эш табыуы, әлбиттә, күпте һөй­ләй.
– Яҡшембәт һәм Кө­йөр­гәҙе малсылыҡ комплекстары “500 ферма” федераль программаһына инде, ә дө­йөм алғанда, улар­ҙың һаны бөтәһе етәү, – тип дауам итә хәбәрен Өлфәт Янар улы. – Заманса эш шарттары булдырыу – тәүмаҡ­саттың береһе.
Кооперативта биш мең­дән ашыу һыйыр малы бар. Әлфиә Мерәҫова (Яҡшембәт фермаһы), мәҫәлән, һигеҙ айҙа һәр һыйырҙан 4 670 литр һөт һауған. Ҡотлоюл­дан Маһинур Аҡһарова менән Көйөргәҙенән Зөлфиә Ишкинина һәм Гөлсәсәк Хәмитовалар ҙа әхирәт­тә­ренән ҡалышмай. Хәйер, ит һәм һөт етештереү буйынса “искра”ларға етеүсе юҡ. Һәр баш малға 30 центнерҙан ашыу аҙыҡ әҙерләнгән.
Ураҡ бик ҡыҙыу барған. Комбайнсылар Шәүҡәт Ишкинин, Илфаҡ Боҫҡанов, Рим Ғәлимов көнө-төнө яланды иңләһә, водителдәр Илшат Түләков, Тәлғәт Мыр­ҙабаев ырҙын менән баҫыу араһындағы юлға саң ҡун­дырмаған. Ерҙе туңға һөр­гәндә иһә Айнур Ниғ­мә­- тул­лин менән Раил Түләков көсөн йәллә­мәгән.
“Искра” хужалығы рәйесе – Башҡортостандың атҡа­ҙанған ауыл хужалығы хеҙ­мәткәре Рәмил Мостафин. Етәксе үҙ бүлмәһенә эшлекле тәҡдим менән инеү­селәрҙе һәр саҡ хуплай. “Тир түккән – етеш йәшәгән” тигән мәҡәлде тормош девизы итеп алған. Халыҡҡа шөғөл булһын, ғаилә башлығының һәр береһе үҙен ысын ир итеп тойһон – бына нимәләр иң беренсе борсой Рәмил Ғиниәт улын.
Ҡараш иңләмәҫлек май­ҙан­ды биләгән көнбағыш баҫыуына яҡынлаштыҡ: әй­терһең дә, унда кемдәрҙер көрән таҡыя кейгән дә ниҙер көтә. Ҡеүәтле комбайндар баҫыу­ҙы иңләй, “ЗиЛ” машиналары сиратҡа теҙелгән. Өлфәт Исхаҡов билдәлә­үенсә, ерҙе эшкәртеүгә көстө ни тиклем йәлләмәһәң, ул һиңә уңышты шул хәтлем мул бирәсәк.
Әлеге баҫыу 100 гектар майҙанды биләй. Көнбағыш­тың ғәҙәттәгесә эре түгел­леге ғәжәпләндерҙе. Ап­­ты­- рау­лы ҡарашымды тойған агроном:
– Был культура май өсөн үҫтерелә, үтә ваҡ тип әйтмәҫ инем. Уның ҡарауы, майы тәмле, – тине.
Һүҙ ҙә юҡ, күршеләр алдында һыр бирмәй “ис­кра”­лар. Эшһөйәрҙәр ху­­жа­лыҡ йөгөн ырамлы тарта, кемде генә алма, һәр береһе мул һәм етеш йәшәй.