Ошо көндәрҙә Ҡырмыҫҡалы, Миәкә һәм Саҡмағош райондары яландары ла техника тауыштарына күмелде. 700 гектар самаһы майҙандан 16 мең тонна сеймал сығарылып, шуның 5,5 мең тоннаһы шәкәр заводтарына оҙатылған. Һәр гектарҙан уртаса 235 центнер уңыш алына. Быйыл техник культура 50 мең гектарҙы биләй һәм, белгестәр фаразлауынса, уның һәр гектарынан 280 центнер уңыш йыйып алыу мөмкинлеге бар.
Уҙған аҙнала плантацияларҙағы уңышты йыйыуға арнап Бүздәк районында үткәрел­гән семинарҙа билдәләнеүенсә, Мәләүез, Раевка һәм Шишмә шәкәр заводтары сеймал ҡабул итергә тулыһынса әҙер. Респуб­ли­каның ауыл хужалығы министры Николай Коваленко семинарҙа ҡатнашҡан 24 район вәкилдәрен 25 октябргәсә плантацияларҙа эште тулыһынса тамамларға саҡырҙы. Һәр комбайнға уртаса 320 гектар тура килеүен иҫәпкә алғанда, бурыстың атҡарыласағына ышаныс бар кеүек.
Семинарҙың Бүздәк районында уҙғары­лыуы осраҡлы түгел: бында техник культураны үҫтереү буйынса матди база ла, ныҡлы тәжрибә лә тупланған. Былтыр, мәҫә­лән, һәр гектарҙан 415 центнер уңыш йыйылыуын иҫәпкә алып, быйыл сәсеүлектәрҙе тағы ла 403 гектарға киңәйткәндәр. Шәкәр сөгөлдө­рөнөң барлығы 5746 гектарҙа игеле­үе, быйыл юғары етештереүсәнле өс “Грем­ми” комбайны һәм бер “Холмер” тейәгесе һатып алыныуы был культураға ныҡлы иғтибар бирелеүе хаҡында һөйләй.
Иген культураларының өстән ике өлөшө урып һуғылып, 2 миллион тонна самаһы ашлыҡ йыйылған. Ейәнсура районы иген­селәре, йыл урағын Башҡортостанда бе­ренселәрҙән булып тамамлап, 16,2 мең тон­на уңыш алған. 27 район – борсаҡ, 24-е һоло һәм 9-ы арпа урағын тамамлаған.
4 сентябрҙә үткәрелгән селектор кә­ңәш­мә­һендә Башҡортостан Хөкүмәте вице-премь­еры Эрнст Исаев, һауа шарттарының көйһөҙлөгөн иҫәпкә алып, 25 сентябргә иген культураларын йыйыуҙы тамамларға са­ҡырҙы. Синоптиктар фаразлауынса, 13, 14 сентябрҙә ҡыҫҡа ваҡытлы ямғырҙар яуыуы, ә октябрь аҙағында ҡар ятыуы көтөлә.