Был йүнәлештә маҡсатлы алға барыу­ҙы дауам итеп, бөгөн дөйөм хаҡы ун миллион ярым һумға төшәсәк өс силос соҡоро эшләүгә тотонғандар. Улар­ҙың һәр бере­һе өс мең тонна яҡшы сифатлы, һутлы мал аҙығы һаҡлауға иҫәп­ләнгән. Белгес­тәр әйтеүенсә, әҙер плитәләрҙән ҡоролға­нына ҡарағанда бетон иҙелмә менән урын­да ҡаплап төҙөлгән баҙ күпкә осһоҙға төшә.
– Ҡоролмаларҙың фермалар эргәһен­дә генә булыуы ҡул көсөн швед фирмаһы “Dеlaval” сығарған аҙыҡ турағыс менән тулыһынса тиерлек алмаштырырға мөм­кинлек бирә, – ти хужалыҡтың баш зоотехнигы Радмир Рәхимйәнов. – Һө­ҙөм­тәлә – утлыҡсаға тейешле файҙа­лы ҡатнашмалар менән әҙерләнгән туҡ­лыҡлы мал ризығы һалыу күпкә еңел­ләшә. Халыҡ әйтмешләй, һыйырҙың һөтө телендә бит. Икенсе яҡтан продук­цияның үҙҡиммәте кәмейәсәк, сифатына ла ыңғай йоғонто буласаҡ.
...Беҙ килгәндә Шулған фермаһы янын­дағы силос соҡоронда эш дәррәү бара ине. Уны Ҡазан ҡалаһының “Инсайт-СТ” яуаплылығы сикләнгән йәмғиәте башҡа­ра. Директор урынбаҫары Алексей Вилков әйтеүенсә, Башҡортостанда мал­сы­лыҡ биналарын төҙөү, яңыртыу һәм төҙөкләндереү менән ойошма өсөнсө йыл шөғөлләнә. Илеш, Краснокама һәм Шаран райондарының “500 ферма” программаһында ҡатнашҡан хужалыҡта­рында үҙен тик яҡшы яҡтан ғына күрһәт­кән йәмғиәттең эшенә бында ла дәғүә юҡ.
Ете кешенән торған бригада иртәнән кискәсә — төҙөлөш майҙанында. “Иҙелмә ҡата бит”, — тип тураһын әйтеп, силос баҙының төбөн арматуралы бетон менән нығытҡан егеттәр фотоға төшөргә һәм һөйләшергә лә туҡтаманы. Бер көн алдан ғына яуып киткән ҡойма ямғырҙан һуң яҡын килә алмаған “КамАЗ”-дан иҙелмә ташыусы Мгер Мгерян атлы тракторсы ғына объективҡа (һүрәттә) йыл­майырға ваҡыт тапты.
Бөгөн хужалыҡтың өс һауын төркө­мөн­дә лә йәйләү осоро уңышлы бара. Һөт һауыуҙа, “Волга” аппаратын ҡулланып, егерме дүрт оператор фиҙакәр эшләй. Уларҙың һәм малсы-көтөүселәрҙең ты­рышлығы менән тәүлегенә ун өс тоннанан артыҡ һөт етештерелә. Сифатҡа иғ­ти­бар көслө. Баҙар шарттарында башҡаса булыуы ла мөмкин түгел.
Һәр йәйге лагерҙа ҡуйылған икешәр тонна һыйҙырышлы һыуытҡыстар һөттө ҡулланыусы килеп алғансы һаҡларға мөм­кинлек бирә. “Һауылғанды ни эш­лә­тер­гә?” тигән һорау ҙа күптән хәл ителгән. “Өфөһөтагропром” йәмғиәте тик юғары сифатлы “аҡ”ты махсус маши­наларҙа үҙе килеп ала һәм продукция өсөн аҙна һайын иҫәпләшеп тора. Был үҙ сиратында малсылыҡта ғына түгел, хужа­лыҡтың башҡа тармаҡтарында эш­ләү­­се­ләрҙең дә ваҡытында хеҙмәт хаҡын алып барыуын тәьмин итә.
Крупская исемендәге хужалыҡтың уңыштары нигеҙендә ябай малсынан башлап белгестәрҙең һәм, әлбиттә, етәк­селектең ныҡышмалы көндә­лек хеҙмәте ята. Сирек быуатҡа яҡын хужалыҡ башлығы Башҡортост­андың ат­ҡаҙанған ауыл хужалығы хеҙмәткәре Фаил Нурғәлиев үҙе лә, уның ҡулы аҫтында эшләгән белгестәрҙең берҙәм командаһы ла киләсәккә ҡарап, юғары һөҙөмтә өсөн тырыша.