Ойошмала сауҙа эштәре менән шөғөлләнгән Юлизә ханым Сәйфуллина бөтәһен дә иғтибар менән тыңлай, ҡасан килергә кәрәклеген аңғарта.
– Әле өс айлыҡ тауыҡтар килтерелде. Бөгөндән алырға мөмкин.
Ҡош-ҡорттан уңышты тиҙерәк алырға, аҡса эшләргә мөмкинлек ҙур. Йыбанма ғына. Ҡасандыр халыҡ диңгеҙ аръяғынан килгән “Буш боттары” тип иҫе китһә, хәҙер үҙебеҙҙә үҫтерелгәненә өҫтөнлөк бирә. Шуға ла Туғыҙлылағы “Аҡҡош” йәмғиәтенең ошо юҫыҡта эш башлауы был тирәлә йәшәгәндәр өсөн ҡыуаныслы ваҡиға була. Колхоздың һөтсөлөк фермаһының буш торған биналарына ҡарап, күптәр, бөтөүле нәмә юҡҡа сыға инде, тип уфтанһа, Дамил Сәйфуллин атлы уҙаман тәүәккәлләп, ҡураларҙы үҙенә йүнләп ала. Был 2010 йылда була. Ҡатыны Юлизә ханым да иренә көс, дәрт биреп торғас, эштәр алға бара. Өс бинаның да ҡыйығын матурлап ябалар, тәҙрәләр ҡуялар. Эске өлөшөн үҙгәртеп ҡороу өсөн дә ҙур ғына көс талап ителә. Бер йыл тигәндә бөтәһен дә көйләгән уҙаман эш башлап ебәрә. Балалар баҡсаһында мөдир вазифаһын башҡарған ҡатыны ла бында килә.
Бөгөн ойошмала 18 – 20 кеше эшләй. Айырыуса себеш ҡараусылар Рәмилә Ғәниева, Ирина Яппарова, Айгөл Фәрхиуллиналарҙы маҡтап телгә алды хужа. Бөгөн уларҙың эше көйлө генә бара. Тракторҙары ла, машиналары ла бар. Республиканың төньяҡ-көнсығыш төбәгендәге биш район, шулай уҡ Ырымбур, Свердловск, Силәбе өлкәләре, Пермь крайы халҡы уларҙан ҡош-ҡортто даими һатып ала.
— Бөтә кешенең дә себеш алып, уны ҡарап үҫтерергә мөмкинлеге, ваҡыты юҡ. Ундайҙар өсөн бер аҙ үҫкән бәпкәләр һатабыҙ, -– ти Юлизә ханым.
Былтыр ойошмала ике мең самаһы ҡаҙ үҫтереп һатҡандар. Бының өсөн үҙҙәренең махсус һуйыу, эшкәртеү цехы бар. Бөтә эште лә ҡул менән башҡаралар. Шуға ла әҙер продукция һыуытҡыста оҙаҡ ятмай. Уларҙы әллә ҡайҙан эҙләп килеп етәләр. Ҡаҙ мамығын, Мәскәүҙәге ойошма менән килешеү төҙөп, килограмын 500 һумдан һаталар.
Бөгөн аяғында ныҡлы баҫып торған Сәйфуллиндар үҙҙәренә табыш алыуҙы ғына маҡсат итеп ҡуймай. Улар ауылда ғына түгел, районда төрлө байрамдарҙы үткәреүҙә ихлас ҡатнаша. Ярҙам һорап килгәндәрҙе лә бороп сығармайҙар. Күптән түгел ауыл мәктәбенә өҫтәл теннисы бүләк иткәндәр.
Бығаса Өфө ҡалаһында эшләп йөрөгән улдары Вадим да ауылға ҡайтып, атаһын алыштырып, хәҙер башҡарма директор вазифаһын үтәй.
— Эшем оҡшай, – ти ул. – Күптән түгел витаминлы ҡатнаш аҙыҡ етештереү өсөн махсус машина һатып алдыҡ. Техникабыҙ етерлек.
Ихлас, үҙенә ышанған, аҙымдары баҙыҡ был егеттең атаһының эшен уңышлы дауам итәсәгенә шик юҡ.